ساواش اینسانلاری
کیان خیاو
بیزدن اوزاق
قوجاغیندا پاندا اویونجاق
یوخودان اویانمایا‌جاق
بیر اوشاق
وار.
بیزدن اوزاق
گونش اویانما‌دان اویانمایا‌جاق
کؤینه‌یی‌نین یاخاسیندا سئرچه یووالانمایا‌جاق
بیر قادین
وار.
اولما‌دان یاتاق‌لاریندا یوخو گؤرورلر کسین:
بیز
قاراباغ، کرکوک، اورومچو، غزه و تبریز
اینسان، قوش، آغاج، ببه‌نک و گئشنیز
یاوان- یاوان بویا‌لارلا تؤکولن سؤزجوکلریمیز
اونلاری سئوه‌رک
رسیم چکه‌رک
بوتون دیدرگین یول‌لاری آزا‌راق
یازا‌راق
یوخو گؤروروک.
و بیز
ایلبیز
ائرکن یوخودان دورونجا
آلیجی دانسئرلری‌یله بیرگه سوزوروک
سونرا یورولونجا
اؤنوموزه قهوه سورساتی دوزوروک
داها سونرا گونش آلتیندا یویونوب قیزیریق
و شه‌هه‌رین بور- بوجاغینا سیزیریق.
من اوشاغی گؤرورم
بیر یانیندا باشی بد‌نیندن آیری بیر گلینجیک؛
داغیلمیش قانلی ساچینی هؤرورم.
من قادینی گؤرورم
ایکی گؤزو ایکی قوروموش دنیز؛
قییی‌سیندا شاعیر عؤمرومو سورورم.
اویسا
گؤوده‌سی یانمیشلیقدان
قارانلیقدا سئچیلمه‌ین بیر قادین
اللری دوغرانمیشلیقدان
بؤیرونده بیر پاکات سودو ایچیلمه‌ین بیر اوشاق
آرتیق بیزی یوخو دا گؤرمورلر آنجاق!…
۱۳۹۳/ ۴/ ۲۶ (۲۰۱۴)
