بو گئجه
اولکر اوجقار

یئتیشدیکجه
نار کیمی
چاتلایان بو گئجه
منیم!
گؤی مچیدییمیزین ایتن،
کرپیجلرینی
قومرال گؤزلریندن
گیله- گیله
دریب یئرینه قویوم.
تبریز زلزله سینه بیر داها گل دئمیشم
بو گئجه.
مچید چاخیرلی
بویالار سرخوش
آچ گؤزلرینی
بیزیم ناخیشلاری وئر!
مچید چاخیرلی
بویالار سرخوش
آغ دونلا اؤنومده سماها گلن بو گئجه
منیم!
«یورو گؤزل یورو یولوندان قالما!
ایییدین آلنینا یازیلان گلیر…» *
گئتمک ایسته ینلرین سماهینا
آیاغی گلن اییید قوربانی!
هارایا  باش گؤتورمک ایسته سن
گؤتور بو گئجه
من یازیرام آلنینی
ایییدجییم جانیم!
تانرینین بارماقلاری خینالی.
دان سؤکولمه‌دن
آددیملارین
دؤنه سی
گئتدیکلرین
دؤنه سی.
نار دانالیرام سنه!
گولگز نار
بو گئجه
منیم!
سن
بو گئجه
منیم!
آلنینا یازیلان
بو گئجه
منیم!

۹۰.۳.۱۰
* بیر قیزیل باش سماهی