ایکی شعر
واهاب حاجی‌زاده

(۱)
بوردا
سنسیزلیک سیزیر،
سیزیلتی‌لار سوسور،
ثانیه‌لر ساریلیق توتور،
و دیقه‌لر دگیرمان تک جانیمی اویودور.

(۲)
بیر گون
ناغیل اولاجاق،
آغیزلاردا دئییله‌جک:
بیری وار ایدی،
بیری یوخ ایدی؛
یوخ اولان –
وار اولانین یوخا چیخمیش واری‌ایدی.

بیر گون
نه شعیر اولاجاق،
نه بو آنالوگ سئوگی‌لر،
نه بو دالغالار؛
مین بیر ناغیلدان سونرا
آغیزلاردا بو دئییله‌جک:
وار ایدی
یوخ ایدی
یوخ ایدی
وار ایدی.

بیر گون
ناغیل اولاجاق؛
نه سن اولاجاقسان،
نه من…!