ایکی شعر
ائلیار پولاد
(۱)دوروم
باغیریردی سس‌سیزلیگیمده حیات؛
کؤکسومه سانکی اود قالامیشدیلار،
یانیردی قافام
گؤینه‌ییردی ایچیم،
سالخیم سؤیوده بنزه‌ییردی
بوتون دوروشوم.
فیکیرلر اورتاسیندا دوشگونجه‌سینه
داریخیردی-
شعور آلتی بیلینجیم،
اریییردی بیر وارلیق
غورورونا دایانارکن…
(۲)حرفلر
آنلادیم گؤزلریندن
ابدیتین نه اولدوغونو؛
اؤیره‌ندیم اوره‌ییندن
لاله‌نین قان رنگینی؛
دانیشا بیلمه‌دیم،
دویدوم کلمه‌لری؛
هوپدو وارلیغیما
هاوادا اوینایان حرفلر:
آ…
زاد…
لیق.
