شعرلر
اکبر صالحی(قاداش)

(۱): تورپاق یاشادار
سئودیگی تورپاقدا قویلاندی
عؤمور بویو تورپاغی قوجاقلادی؛
تورپاق‌دا اونو بیر آنا کیمی باغرینا باسدی،
تورپاقلا یاشادی.
تورپاق یاشادارمیش اؤز ایسته‌دیکلرینی،
او دا عؤمور بویو-
تورپاغین توزونو سیلمیشدی،
اونو پاریلداتمیشدی،
آغی‌یلا، قاراسی‌یلا،
چئشیدلی بویاسی‌یلا؛
هه! پاریلداتمیشدی-
اؤزونون ایچ بویالاری کیمی.

(۲): قیزدیرما
قیزدیرمام اوددان اوٍستوندور،
نه‌دن آلیشمیرام، نه‌دن توٍستولورم؟
هانی بیر قیویلجیم؟
هانی منیم آلووومو گؤیلره قالدیران؟
کیم منده قیزیشیب،
کیم مندن یاناجاق؟
منده قیزیشانلار،
منه قور آتین!
منله آلوو اولون،
منله بوی آتین!
منله گؤیه چاتین،
منله آی اولون!
قویون خرمنچی‌لر شنه‌سین تاپیپ،
ایشیقدا آییرسین دنی ساماندان.

(۳): کئشکه
کئشکه اودون اولایدیم،
کؤزو دوٍشموش اودلاری بیر ده آلیشدیرایدیم.
آلوومو یوکسلدیب
آلوولارلا یان- یانا گؤیه باش قالدیرایدیم.
بیرده قیزیشدیرایدیم
سویوق، سوسقون دوٍنیادا
بوٍتون اوشوینلری.
اینسانلارین قانلارین قاینادایدیم داماردا،
باغیرلاری آچایدیم قوجاق- قوجاق بیر-‌ بیره؛
دؤشلر گئنیش تارلا تک
محبتله، سئوگییله دؤشنه‌یدی شیتیله.