سنسیزلیک‌لر(۳)
مجتبی نهانی

(1)

سوسقونلوغا آلیشمیشام
آمما سسین تومارلاییر-
ایچیمده کی یالقیزلیغی
بیر آن اوچان گؤورچین‌لر کیمی،
سئوینجیمی پایلاشیرام-
گؤیده کی بولودلارلا
بوتون آجیلار-
یوخلوغا دوغرو گئدیر
بو یوخودان آییلماق ایسته‌میرم
یالواریرام منی-
ساغا – سولا ییرغالا، آنا.

(2)
باشقا دومان یوخدور
باخیشلارین بولانیب
سیلکه‌له بو دامارسیز سسسیزلییی.

(3)
بوراخما منی
اود یاختیغی کیمی گَلیر
کئچر و دورماز
دورسان، یانارسان
کئچسن، یانارسان
بیر چیخمازا دوشرسن
اللرین اولماسا
بیر ایشیق گَلمسه
نئجه قورتولارام بیلینمز.

(4)
باخیرسان اما گؤرمورسن
گؤزونون قاباغیندان-
چکیلمیرلر آخی!

(5)
آی توتولسون دئیه
بولود چکیرسن اوزونه
گئجه-گونوز یانیرام آخی!