قاتار قاییتماز
علی جوادپور
نه اؤزون گلیرسن، نه‌ده خبرین
یوخ، سنی آپاران قاتار قاییتماز.
یول‌لار یادیرغایار، اونودار
یول‌لار کورک اوسته یاتار،
قاتار قاییتماز!
گئده‌ر دیانماز کی ایلین قاتاری
گئده‌ر بئی قاتاری، گلین قاتاری
کیم دئییر قایتاراق گلین قاتاری
گئده‌ر گؤزدن ایتر، قاتار قاییتماز.
گئتدین ایندن بئله هر گلنده یاز
سولغون گؤرونه‌جک چیچک‌لر بیر آز
سونبول‌لر ساچینی کولک داراماز
ایل‌لر باشا چاتار، قاتار قاییتماز.
گئدنده دولویدو بو بوش قاتارلار
دونیا قاتار- قاتار بوشالار، دولار
کیمدن کوسمک اولار، اینجیمک اولار
الین هارا یئتر، قاتار قاییتماز.
یاغیش یادداشلاردان ایزلر اونودور
هر گون عؤمروموزدن بیر گونو اودور
یالاندان گؤزله‌ییر “علی جوادپور”
یوخ، سنی آپاران قاتار قاییتماز.
5 پاسخ
چوخ گوزلدی وار اولاسان علی معلم
çox gözəldi əli bəy
yashasin bizim dayarli usta
چوخ گؤزه‌لدی علی بی اللرینه ساغلیق
…”گئدنده دولویدو بو بوش قاتارلار
دونیا قاتار- قاتار بوشالار، دولار
کیمدن کوسمک اولار، اینجیمک اولار
الین هارا یئتر، قاتار قاییتماز.”…
چوخ گؤزل.چوخ ساغ اولون پایلاشدیغینیز اوچون.