اوردا بیر گؤل واردی
افراسیاب نورالهی

اوردا بیر گؤل واردی
سون گؤردویومده چوخ بختیاردی
قیزلار،
یوخولارینی دانیشارمیش سولارینا
گلین‌لر،
سیرلرینی آچارمیش
گلن‌لرین،
قاباغینا قاچارمیش دئییرلر
گئدن‌لرین،
آردینجا آتیلارمیش
قالان‌لارین،
قاداسینی آلارمیش
ماهنیلاشارمیش
اینسانلاشارمیش
…”قالارسان قادان آللام
گئدرسن یولا ساللام”…
ساحیل بویو،
تامسینا- تامسینا قالارمیش گئجه‌لر
گویا،
قوش ایزلری،
اینسان ایزلری یالارمیش گئجه‌لر
اسکیله‌سی،
گمیسی،
آداسی وارمیش
سن دئمه،
اونو‌ن‌دا،
آلیناسی قاداسی وارمیش
بیر سفرده من واردیم
من کئچدیم اورالاردان
بیر سحرده،
مندن کئچدی اورالار
نه‌لر کی؛
یاشامادیم!
گؤرمه‌دیم او سحر!
نه یاخشی،
او سحریده یاشامادان اؤلمه‌دیم او سحر!
مثلا،
گؤنشین ایلک دوشدویو آنی گؤردوم
هئچ تصوورده ائده بیلمزدیم کی؛
تصویرده ائده بیلیم گونشی دنیزده
گؤردوم،
حله ییرغالانیردی‌دا
آما،
یئنه‌ده اوزونه باخماق اولموردو
و اؤیله بیر تصویر کی؛
سانکی،
گؤیده‌ده،
یئرده‌ده آسمانی گؤردوم!
من،
او سحر،
بامباشقا بیر عالمی؛
اورمولو، گؤللو، دنیزلی آذربایجانی گؤردوم
من،
او سحر،
هئچ گؤرمه‌دییم هیجانی گؤردوم
اوردا بیر گؤل واردی
ایندی “یوخدو” دئییرلر
“قورودو”،
“یئرینده،
یئل وورور یئنگه‌لر اویناییر” دئییرلر
بو قدر راحات
بو قدر فرقینده اولمادان
اینانمیرام
“یالاندی” دئییرم
ماسالدی
اوردا بیر گؤل واردی
اوردا بیر چؤل اولاماز
اصلا اولاماز
5/۱۲/۱۳۹۲