سنسیزلیک‌لر(1)
مجتبی نهانی
(1):
دمیر یولو-
اوتاغیمین ایچیندن کئچیر،
بو یالنیزلیق-
منی هارالارا آپاراجاق؟!
(2):
یامان گونه قویماسین-
اوره‌ییمده کی سؤزلری-
سسسیزلیک،
سنسیزلیک.
(3):
دیلیم، داماغیم قورودو
گئجه قوشو اوچدو
اللریم اللرینی آختاریر.
(4):
اَن درین‌لرده
-دنیز دیبینده-
بالیق‌لار آراسیندا
یاشاماغا داریخمیشام،
من بیر بالاجا آغ ناققا بالیق دوغموشام
یالنیز اولماق، دَریمده گیزلی‌دیر.
(5):
گَل قوللارینی آچ
بیر دونیا آزدیر سنی سایماغا
سونسوزلوق بونا گؤره یارانیب.
2 پاسخ
گؤزل شعر لر اوغورلار اولسون
ایشیق امکداشلارینا سونسوز تشککورلر . یاشییاسیز.