دونیا قادینلار گونو موبارک اولسون
اورادا تک کیشی وار!
ملیحه عزیزپور
اورادا تک کیشی وار!
وارلیغی یوخلوقدان بیر آز چوخ
یاندیریلمیش آغاج کیمی.
کیمیسه،
گونشی دارا چکمیش گؤزلرینده
گؤزللییینی قیسیرلاتسین دئیه !
اورادا تک کیشی وار!
هئچ یئرده ، هئچ یئری یوخ .
آچیلمامیش قورشوندور اوره‌یی
ایچینده توپلانیب چیی عوصیانلاری.
اورادا تک کیشی وار!
دجلیگی یوخ درجه‌سینده .
گؤزلری بره‌لی باخیر
“نه منه لیک” ائدنلره !
حاققین ساققالینا گولور…
اؤلومله اوز- اوزه گلیر
یئنه گولور…
اورادا تک کیشی وار!
او دا،
بیر قادین …
