کور بیر گوندوز
سعیدفیوضات
کور بیر گوندوز دور
یاشادیغیم بو گئجه‌لر
هله ده باغلی قالیب
صاباحا ساری اوزاتدیغیم اللر
گونلر گئدیر
صاباح گلمه‌ییر
دالدان آتدیغیم داش
اؤزتوپوغوما دییر
هر آخشام بالیقلی{۱} دان،شهره‌جن چؤکور
اسکی ائولرین نمو{۲} اییسی قالخیر
بو سس‌سیز دومانلی گئجه‌ده
بیر هنیرتی وار
امن{۳} باغیندا بیر هؤنکورتو
باغ میللی{۴} ده سیز سیزلایان
و ساوالاندا بابالارین باغیرتیسی
داغلارا گئدیب گلمه‌ین‌لرین
یئری گلیر
دیله‌دیکلریمدن اوزومون سویو تؤکولور
سیزغین بیر یاغیشدا
آرزولاریم آخیب گئدیر………
بولاقلارا مزار اولسا
یئرینی کیم بیلیر
قیش۹۲
{۱}اردبیلین آدلیم چایی
{۲}نَمو –رطوبت ایسی
{۳}اردبیلین عباسیه و آغا کاظیم محله سینده یئرلشن اسکی باغ
{۴}اردبیلین اسکی باغی.سون واختلار سؤکولدو
