گول
اکبر رضایی مولان

گیزلی قالمیش کؤنول داغی دئییلسن

اوره‌ک سیخان آخشام چاغی دئییلسن

گؤزه‌ل یارسان سن کی یاغی دئییلسن

گول گول اوچون گولده گولسون سن اوچون

قاباقجیل اول اویناماغا گولماغا

جان آتما سن سارالماغا، سولماغا

فیکیر وئرمه غم کدره، دولماغا

گول گول اوچون گولده گولسون سن اوچون

مهربان اول دوستونا هم دوشمنه

کؤنول وئرسین یاغی سنه یار سنه

همیشه‌لیک بیرجه سؤزوم وار سنه

گول گول اوچون گولده گولسون سن اوچون

بوگون وارام ،صاباح یوخام بلکه ده

من اینسانام سئوگیلی‌یم هر کسه

آغلاما هئچ حیاتیندا بیر کره

گول گول اوچون گولده گولسون سن اوچون

گولوش وئره‌ر حیاتا یئنی‌لیک‌لر

یئتر بیر گون سونا بو دیریلیک‌لر

غرورسوز اول بار وئرمز ایریلیک‌لر

گول گول اوچون گولده گولسون سن اوچون

خوش باخیش اول قوجایا هم جاوانا

اومید قالما باش اوستونده تاوانا

دؤزوملو اول توخلوغا هم یاوانا

گول گول اوچون گولده گولسون سن اوچون

بو حیاتا دردده غصه ده یاردی

گئنیش دونیا بؤیوک اینسانا داردی

نه اولسون کی غصه کدرده واردی

گول گول اوچون گولده گولسون سن اوچون

دئییب گولمک اینسانی شنلندیرر

یئری گؤیو داشی دا دیللندیرر

غصه هردم حیاتی لیللندیرر

گول گول اوچون گولده گولسون سن اوچون