شعرلر
آتابای موغانلی

(۱)  سنسیزلیگیم

من سنی سنسیزلیگیمده پایلاشدیم-

تک اؤزومله؛

هپ سنسیزلیگیمده سنی دوشوندوم

و سنینله یاشارلاندیم.

من سنی اؤزوم‌له بیلدیم،

اؤزوم بیلدیم؛

سنه آلیشماق ایسته‌دیم سنسیزلیگیمده،

سن-

سوسدون،

من-

آلیشدیم،

سؤندوم،

و سنسیزلیگیم

بیزی بیزیمسیز پایلاشدی…

(۲)  دؤیونتولر

یوخولاریمدا-

سنی سئیر ائتمه‌گه چیخدیم؛

قوش اوره‌گی کیمی

دؤیوندو اوره‌گیم؛

دؤیونرکن

احتراصلی گئجنده دالیب، قالدیم.

نه آی گئتدی

نه گونلر دولانیب، گلدی.

الین الیمین ایچینده دؤیوندو

و دؤیوندوکجه،

احتراص نبیض‌لرینی سونا یئتیردی…