اورمو گؤلو
ائل اوغلو
بیر گؤزه قورویاندا،
دردی ائله چاخناشدی،
شاعیر بولودا دؤندو!
آغلادی بولاق کیمی
بوتون عالم یویوندو.
بیر بولاق قورویاندا،
یاندی بوتون وارلیغی.
شاعیرده اودا دؤندو،
یاغدی آغ یاغیش کیمی،
ایچین – ایچین دؤیوندو.
بیر چایلاخ قورویاندا،
سوسوز آرخ کاناریندا
دلی سؤیوده دؤندو.
یولدو ساچینی شاعیر،
ائله هارای قوپاردی
بوتون عالم دییندی …..
قورویور اورمو گؤلو
چایلار بولاقلار هانی
قوشاچایدان سو گلمیر
نازلی چای ایلان کیمی
سوسوزوندان مه له ییر.
جیغاتی یولور یئنه
یاسا باتمیش تئلینی
وای دوشور، شیون قوپور
یئنه بیر میللت اؤلور.
هانی اوغول ،هانی قیز،
قورویور اورمو گؤلو
تبریزی توز بورویور
بیر میللتین وارلیغی
دوز ایچینده چورویور
طالعه باخ،باختا باخ!
بونا دؤزوله‌جکمی؟
ساوالانین، سهندین،
یاشیل یایلاقلاریندان
ائللر اوزوله‌جکمی؟
داها عاشیق آلماسی
گؤزله‌مه‌سینمی قیزلار
باغمئشه‌دن، واسمیشدان
شانسینین شورلوغوندان
داها داش دوزا دؤنور
ناغیلللاشیر وارلیغی
تبریزین باختی سؤنور
مارال باخیشلی قیزلار
تبریزدن گئدجکمی؟
شئر بیلکلی اوغوللار
گؤزلردن ایتجکمی؟
بیرده اوخویاجاقمی
او تبریزلی سئوگیلی:
« تبریزین کوچه‌لری دولانبا دولان
قاراگیله دولان بادولان
اگر منی سئومیرسن گئت آیری دولان
قاراگیله گئت آیری دولان
نه منه قیز قحط دیر، نه سنه اوغلان،
قارا گیله، نه سنه اوغلان
قارا گیله گئت آیری دولان »
بیر ده اوخویاجاقمی تبریز حسرتی چکن
کرکوکلو بیر تورکمن:
« گؤزه دیر،
گوموش میل گؤزه دیر
زولفون عجم ایپیی
تئلین تبریزه دیر»
اورموگؤلو قورویور
ائله بیل کی جان وئریر ،
او هایلی کویلو تبریز
گؤرنئجه ساکیتیک بیز.
ایچیمیزده سسیمیز،
ارییر سس سیز- سس سیز
دوداغی کؤپوکله نیب،
اورمو گؤلو جان وئریر.
گلین قان وئرک دوسلار
بیزده جان وئرک دوسلار
یک پاسخ
سلاملار ایل اوغلو جنابلاری
چوخ منت دارام کی بو قارشیداکی بویوک اکولوژیک فاجعه نی بو گوزللیکده شعر دویغوسی ایله بزه میسن. هرکس دوشونسه کی اورموگولو قورویاندان سورا میلیونلار تن دوزو یللر سپیپ و نچه اوستانی قوملاخ کویر ایده جک و اونون خسارتی حتی سیستانداکی وطنداشیمیزادا دیه جک امینم کی الیندن گلن یاردیمی اسرگه مز . کاش ایله بیر یامان گونو نه بیز نه سونکی نسیللر هئچ زامان گورمه سین.