الیم خمیر قارینیم آج…!
چئویرن: حمید آرش آزاد
ترجمه: حمید آرش آزاد
حمید آرش آزاد
00:00
00:00

چون چیخار چوخ- چوخ اولوبدور من اوچون، آز دا گلیر

او دو بیر عؤمر قارین آج قالیب، ال‌لرده خمیر

قبریمین تورپاغی گؤردون شورا قویموش، قیناما

گئجه- گوندوز خوره‌ک اولموش منه شور، کؤهنه پنیر

آلتمیش ایل عؤمر ائله‌دیم، دونیا بئزیکدیردی منی

وای یازیق خضره‌کی، اولموش ابدی عؤمره اسیر

هئی جان آتدیم اؤزومه من‌ده چؤره‌ک پاپماق اوچون

چون مایا اولمادی ال‌ده، چؤره‌ییم اولدو فطیر

یاشاییش بوردا ائله سیخدی، سویوم چیخدی منیم

بوندان آرتیق‌دا دئییرلر سیخاجاق بیرده قبیر

دؤیدولر دونیادا، بیلدیک‌لریمین خاطرینه

دؤیه‌جک قبرده‌ده، بیلمه‌مک اوستونده، نکیر

قورخورام بنده، جهنم‌ده‌ده مستأجر اولام

بلکه مسکن ایشینه، اوردادا وار چوخلو وزیر

حوری یوخ، هئچ منه اؤز آروادیمی وئرمزلر

چون‌کی یوخسول‌لوق  ائدیبدیر اونو من‌دن دلگیر

بیری‌نین‌ده یئری جنّت‌ده اولار یوزمین قصر

حوری- غلمان‌لا اوتاق‌لار دولاجاقدیر بیر- بیر

ساخسی قاب‌دا منه «زقّوم» وئره‌جک‌دیر شک‌سیز

اونا دا بیر چینی بوشقاب دولو زیتون- انجیر

«حافظ» آچمیش سؤزو «مئی»دن، دانیشیب «مئیخانا»-دان

بئله سؤزلر، اولونور ایندی «حقیقت» تفسیر

من «حقیقت» ائده‌رک  قصد، دئسه‌م  بیر حق سؤز

اونو «مئی» تفسیر ائدیب تئزجه یازارلار تعزیر

نه بو دونیان آباد اولموش، نه او دونیان، «آرش»

کاش‌کی، شعرین یئرینه، سن‌ده اولایدی تزویر

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

الیم خمیر قارینیم آج…!

حمید آرش آزاد
www.ishiq.net

آذربایجان ادبیات و اینجه‌صنعت سایتی