ساز
صدیار وظیفه(ائل اوغلو)
ساز،
اوره‌کدن آسیلی‌دیر.
اوره‌ک سازدان.
منیم اوزان بابالاریم
سارایلاردا،
یئمه‌دیلرچؤره‌ک سازدان
ساز، قورقودون اوره‌کلره آتش آچان
دویغولارا ایشیق ساچان
مرمی‌لردن گوجلو سسی
سوسماز دیلی
سازین‌سیزی
جان‌نغمه‌سی
ساز،
ماهنی‌لار اؤلکه‌سی‌نین
یاراشیغی، خزینه‌سی
ساز، “بستی”نین
کوللار اوسته قیزیللانمیش بیرچگی‌دیر
اورهگیدیر
ساز، “بستی”نین آغ‌لئچگی
قیزیل تئلی
سازگونشین رایحه‌سی
دویغولارین اینجه سسی
ساز، قورقودون سوسماز دیلی
ساز، “کرم‌ین” اوره‌گینده یانار کؤزو
ساز، “پری”نین اینجه بئللی
سرو بویلو
گوموش تئللی
شیرین دیللی
ماهنی قیزی،
بخت اولدوزو
ساز، یانیقلی
ساز نسیگیللی
ساز، “دیلقم”ین،
ساز، “قریب”ین
عصیرلردن ـ عصیرلره
کسیلمه‌ین اینیلتیسی،
اوره‌ک سیزی
سرو بویلو “شاه‌صنم”ین
ماهنی قیزی، بخت اولدوزو
تئللی‌سازی قورقود بابا
مجلیسلرده،
مغرور ـ مغرور، چالا ـ چالا
اؤز چینیندن آسلایارمیش
تئللی‌سازی
عاشیق “جنون”
ظفرچالان بیر اوغول‌تک
اؤپوب، اؤپوب
اؤز باغرینا باساریکن چاغلایارمیش
اوزانلارین قیزیل‌سازی
توی دوگونده
قیزیللانمیش هئیکلینه
آل‌گونشین زر تئلیله ایلمه‌لنمیش
مخمریه‌لین گئیریش
دؤیوش واختی
عاشیقلارین‌تئللی سازی
قلینج اولدو
قالخان اولدو
سسه گلدی اوردو ـ اوردو
أر عاشیغین قیزیل سازی
هوجوملاردا، دؤیوشلرده
زیره‌لردن گئیدی کؤینک
ساز شیغیدی دؤیوشلرده
اؤن سیرادا
یارالارین آجیسینی دادا ـ دادا
ساز شیغیدی،
اؤن سیرادا بیر اوغول تک
ساز اؤزوده
دؤیوشلرده یاراق اولدو
اوره‌کلرده چیراق اولدو
دؤیوشلرده سازدا گره‌ک
تئللی سازین آیاغینا
دویونلرده توکولرمیش
خزانه‌لر اتک ـ اتک
ساز گولرمیش،
ساز گولرمیش
آغلاماقدا،
آغلایارمیش اوره‌ک ـ اوره‌ک
ساز، “دیلقم”ین آلاولانان اوره‌گی‌سه
کوراوغلونون،
قنیملره قان آغلادان
قیلیج کیمی گره‌گی‌سه
علسگرین بیر قرینه
آییق قالان ببگی‌دیر،
اورهگیدیر
ساز، “آلی”نین اورهگیدیر
ساز، “گویچه”نین دوواقلاری
چیچکلرله ایلمه‌لنمیش گلینی‌دیر
ساز دیننده،
اوره‌کلرده ماهنی گولر
الهام جوشار،
دالغالانار پرده ـ پرده
آشار، داشار
خان “آراز”دا، ده‌لی “کور”ده
ساز دیننده،
قوچاقلارین أللرینده
دوْنوب قالان پاسلی قیلینج
اورهکلهنر، اورهکلهنر
اینام دوغار
قیلنج‌لارین کسرینده
هجوم چکسه کؤنوللره قارانلیقلار
سازین قیزیل ساچاغیندان
قارانلیقلار اوردوسونا اوچوب گئده‌ر،
کلمه‌لردن آلولانمیش قیغیلجیم‌لار
قارانلیغی یاندیرارلار
زر ساچاقدان اوچوشانلار
میضرابلارین قانادیندا یاتیشانلار
ساز، اودلارا قالاقلاندی
أریمه‌دی
مضرا بلارلا قامچی‌لاندی
کیریمه‌دی
بلکه‌ده ساز تورپاقلارا کؤک سالاندا
عینی دؤزوم هئیکلی‌ایدی
ساز آسیلدی ایگید کیمی
دیزی ـ دیزی یئریمه‌دی
آنجاق، سازین آسلاناغی
عاشیقلارین اگیلمه‌ین قامتی‌دیر
ساز اوره‌کدن آسیلی‌دیر
اوره‌ک سازدان
ساز آسیلدی غملی ـ غملی
مین اوره‌‌گین نغمه آخان تئللر ایله
نئچه ـ نئچه اوره‌ک تئلی
مئیدانلاردا اوْلدو کندیر
عاشیقلارین
اراده‌سی پولادداندیر، ده‌میردندیر
او مئیداندا اوغول کیمی
آددیمینی قویماز گئری
ساز اوره‌کدن آسیلی‌دیر
اوره‌ک سازدان
ساز ازیلدی چیلیک ـ چیلیک
اوره‌کلرده قالدی یئری
ساز ازیلدی چیلیک ـ چیلیک
هرتاختاسی بیرساز اولدو
تاپان باسدی سینه سینه
اوبا ـ اوبا، اویماق ـ اویماق
یاشا منیم سازیم، دئدی.
قوچ آنالار
نئجه دؤیوش میدانیندا،
دؤنه ـ دؤنه
ساچاقلاری قانا باتمیش
قیزیل سازا
سازیم دئدی
قیزیم، دئدی
گؤزوم، دئدی
اؤزوم، دئدی،
ساز نئیله‌دی،
ساز نئیله‌دی
آنجاق سازین
کؤکدن دوشمز ساچاقلاری
آخدی سازین تئللرینده
مللتیمین ایلک عصیانی
ایلک هارایی
داغ نفسلی عاشیقلارین
بارماقلارا سیغیشمایان مضرابلاری
ایلمه‌له‌دی ـ
نئچه دؤیوش چوخاسینی
زامان ـ زامان،
پرده ـ پرده
شوش داغلارین قلینج‌لانمیش هئیکلینه
أر اوزانین
قیزیل‌سازی دیلله‌ننده
پولادلاری یونتالایان اراده‌لر
بوز داشلارین
قینتاسینی ایتیلده‌رلر
قوش قونمایان زیروه‌لرده
قانلی- قانلی دؤیوشلرده
سازین قیزیل تئللرینه داراق چکن
ساده‌جه بیرمیضراب دئییل
بلکه، اینام قایناغیندا
سواریلمیش بیرقلینج‌دیر
بیرقلینج کی،
حقیقتین گئری دؤنمز کسریندن یونولوبدور
بیر قلینج کی، نئجه گونش جیغیریندان
اوزه‌رینه جان سورولور
اویناغیندا جان دورولور
ساز گونش‌‌دیر
3 پاسخ
سالام منیم انودولماز دوستوم. اوتمک اوخوماق معناسیندادیر. ایل اوغلو
لطفا «اوتمه یه» سؤزونون دوزگونو:« ائتمه یه»دیر.
قدیم دوستوم ائل اوغلو جنابلاری نین «ساز» عنوانلی شعری آدامی چوخ اوزاقلارا آپارارکن
سازلی- سؤزلو اولو بابالارا- آنالارا فخر اوتمه یه گووه ندیریر.