ساز
صدیار وظیفه(ائل اوغلو)
ساز،
اوره‌كدن آسيلي‌دير.
اوره‌ك سازدان.
منيم اوزان بابالاريم
سارايلاردا،
يئمه‌ديلرچؤره‌ك سازدان
ساز، قورقودون اوره‌كلره آتش آچان
دويغولارا ايشيق ساچان
مرمي‌لردن گوجلو سسي
سوسماز ديلي
سازين‌سيزي
جان‌نغمه‌سي
ساز،
ماهني‌لار اؤلكه‌سي‌نين
ياراشيغي، خزينه‌سي
ساز، “بستي”نين
كوللار اوسته قيزيللانميش بيرچگي‌دير
اورهگيدير
ساز، “بستي”نين آغ‌لئچگي
قيزيل تئلي
سازگونشين رايحه‌سي
دويغولارين اينجه سسي
ساز، قورقودون سوسماز ديلي
ساز، “كرم‌ين” اوره‌گينده يانار كؤزو
ساز، “پري”نين اينجه بئللي
سرو بويلو
گوموش تئللي
شيرين ديللي
ماهني قيزي،
بخت اولدوزو
ساز، يانيقلي
ساز نسيگيللي
ساز، “ديلقم”ين،
ساز، “قريب”ين
عصيرلردن ـ عصيرلره
كسيلمه‌ين اينيلتيسي،
اوره‌ك سيزي
سرو بويلو “شاه‌صنم”ين
ماهني قيزي، بخت اولدوزو
تئللي‌سازي قورقود بابا
مجليسلرده،
مغرور ـ مغرور، چالا ـ چالا
اؤز چينيندن آسلايارميش
تئللي‌سازي
عاشيق “جنون”
ظفرچالان بير اوغول‌تك
اؤپوب، اؤپوب
اؤز باغرينا باساريكن چاغلايارميش
اوزانلارين قيزيل‌سازي
توي دوگونده
قيزيللانميش هئيكلينه
آل‌گونشين زر تئليله ايلمه‌لنميش
مخمريه‌لين گئيريش
دؤيوش واختي
عاشيقلارين‌تئللي سازي
قلينج اولدو
قالخان اولدو
سسه گلدي اوردو ـ اوردو
أر عاشيغين قيزيل سازي
هوجوملاردا، دؤيوشلرده
زيره‌لردن گئيدي كؤینك
ساز شيغيدي دؤيوشلرده
اؤن سيرادا
يارالارين آجيسيني دادا ـ دادا
ساز شيغيدي،
اؤن سيرادا بير اوغول تك
ساز اؤزوده
دؤيوشلرده ياراق اولدو
اوره‌كلرده چيراق اولدو
دؤيوشلرده سازدا گره‌ك
تئللي سازين آياغينا
دويونلرده توكولرميش
خزانه‌لر اتك ـ اتك
ساز گولرميش،
ساز گولرميش
آغلاماقدا،
آغلايارميش اوره‌ك ـ اوره‌ك
ساز، “ديلقم”ين آلاولانان اوره‌گي‌سه
كوراوغلونون،
قنيملره قان آغلادان
قيليج كيمي گره‌گي‌سه
علسگرين بير قرينه
آييق قالان ببگي‌دير،
اورهگيدير
ساز، “آلي”نين اورهگيدير
ساز، “گويچه”نين دوواقلاري
چيچكلرله ايلمه‌لنميش گليني‌دير
ساز ديننده،
اوره‌كلرده ماهني گولر
الهام جوشار،
دالغالانار پرده ـ پرده
آشار، داشار
خان “آراز”دا، ده‌لي “كور”ده
ساز ديننده،
قوچاقلارين أللرينده
دوْنوب قالان پاسلي قيلينج
اورهكلهنر، اورهكلهنر
اينام دوغار
قيلنج‌لارين كسرينده
هجوم چكسه كؤنوللره قارانليقلار
سازين قيزيل ساچاغيندان
قارانليقلار اوردوسونا اوچوب گئده‌ر،
كلمه‌لردن آلولانميش قيغيلجيم‌لار
قارانليغي يانديرارلار
زر ساچاقدان اوچوشانلار
ميضرابلارين قاناديندا ياتيشانلار
ساز، اودلارا قالاقلاندي
أريمه‌دي
مضرا بلارلا قامچي‌لاندي
كيريمه‌دي
بلكه‌ده ساز تورپاقلارا كؤك سالاندا
عيني دؤزوم هئيكلي‌ايدي
ساز آسيلدي ايگيد كيمي
ديزي ـ ديزي يئريمه‌دي
آنجاق، سازين آسلاناغي
عاشيقلارين اگيلمه‌ين قامتي‌دير
ساز اوره‌كدن آسيلي‌دير
اوره‌ك سازدان
ساز آسيلدي غملي ـ غملي
مين اوره‌‌گين نغمه آخان تئللر ايله
نئچه ـ نئچه اوره‌ك تئلي
مئيدانلاردا اوْلدو كندير
عاشيقلارين
اراده‌سي پولادداندير، ده‌ميردندير
او مئيداندا اوغول كيمي
آدديميني قويماز گئري
ساز اوره‌كدن آسيلي‌دير
اوره‌ك سازدان
ساز ازيلدي چيليك ـ چيليك
اوره‌كلرده قالدي يئري
ساز ازيلدي چيليك ـ چيليك
هرتاختاسي بيرساز اولدو
تاپان باسدي سينه سينه
اوبا ـ اوبا، اويماق ـ اويماق
ياشا منيم سازيم، دئدي.
قوچ آنالار
نئجه دؤيوش ميدانيندا،
دؤنه ـ دؤنه
ساچاقلاري قانا باتميش
قيزيل سازا
سازيم دئدي
قيزيم، دئدي
گؤزوم، دئدي
اؤزوم، دئدي،
ساز نئيله‌دي،
ساز نئيله‌دي
آنجاق سازين
كؤكدن دوشمز ساچاقلاري
آخدي سازين تئللرينده
مللتيمين ايلك عصياني
ايلك هارايي
داغ نفسلي عاشيقلارين
بارماقلارا سيغيشمايان مضرابلاري
ايلمه‌له‌دي ـ
نئچه دؤيوش چوخاسيني
زامان ـ زامان،
پرده ـ پرده
شوش داغلارين قلينج‌لانميش هئيكلينه
أر اوزانين
قيزيل‌سازي ديلله‌ننده
پولادلاري يونتالايان اراده‌لر
بوز داشلارين
قينتاسيني ايتيلده‌رلر
قوش قونمايان زيروه‌لرده
قانلي- قانلي دؤيوشلرده
سازين قيزيل تئللرينه داراق چكن
ساده‌جه بيرميضراب دئيیل
بلكه، اينام قايناغيندا
سواريلميش بيرقلينج‌دير
بيرقلينج كي،
حقيقتين گئري دؤنمز كسريندن يونولوبدور
بير قلينج كي، نئجه گونش جيغيريندان
اوزه‌رينه جان سورولور
اويناغيندا جان دورولور
ساز گونش‌‌دير
3 پاسخ
سالام منیم انودولماز دوستوم. اوتمک اوخوماق معناسیندادیر. ایل اوغلو
لطفا «اوتمه یه» سؤزونون دوزگونو:« ائتمه یه»دیر.
قدیم دوستوم ائل اوغلو جنابلاری نین «ساز» عنوانلی شعری آدامی چوخ اوزاقلارا آپارارکن
سازلی- سؤزلو اولو بابالارا- آنالارا فخر اوتمه یه گووه ندیریر.