نئجه اینانیم؟
اولکر اوجقار
سنین ایکی قورتوملوق قومرال گؤزونه
نئجه اینانیم؟
او یئکه‌لیکده
ماویلیکده
اورمو گؤلو
ایلغیم ایمیش
الیمی آتاندا دوزا چیخدی!
دالیرام اینانمیرام
جومورام اینانمیرام
بوغولورام اینانمیرام
گلمه‌یه‌جک گلینین،
بیر یئرلیدیر تورپاغی یوخ!
او تورپاغی یوخدا
بیر گؤللری وار سویو یوخ!
او سویو یوخدا
گونده بالیقلاماغا چیخیر، تورو یوخ!
تورو یوخونا
بو گون بیر جوت قومرال رنگده
گؤی مینجیغی دوشوب
اینانسین اینانماسین؟
.
.
.
دالیرام اینانمیرام
جومورام اینانمیرام
بوغولورام اینانمیرام…
