اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

LEAD Technologies Inc. V1.01
وطنیم‌ منیم‌/
هاشم ترلان

   سلام‌ اودلار یوردو، سلام‌ ای‌ وطن‌,

 تابیم‌ توانیم‌ منیم,‌ وطنیم‌ منیم‌!

 قوینوندا اولماسامدا, آیری‌ دوشسمده‌ سندن‌

 سنینله‌ یاشایان‌، سنینله‌ دوران‌

 اؤز اوغلونام‌ من‌, ترلانام‌ من‌.

 *

بیلیرم‌ مندن‌ گیله‌یین‌ده‌ وار،

 بیلیرم‌ بوینومدا امه‌یین‌ده‌ وار.

 دئییرسن‌ یقین‌:

 – گوللره‌ شعیر یازان‌،

 ائللره‌ شعیر یازان‌ ترلانیم‌ منیم‌

یادینا سالمیر منی‌,

بلکه‌ اوجوز توتور دوغما وطنی‌.

بودور جوابیم‌ منیم‌،وطنیم‌ منیم‌!:

-دئییرم‌ باشیندا اسمه‌سین‌ کولک‌،

 نه‌ یازیم‌ آدینا یاراشسین‌ آنا؟!

 هر شعریم‌ گونشین‌ شعالاری‌ تک‌،

 او آغ‌ ساچلارینا داراشسین‌ آنا!

 یازیم‌ گونشسن‌؟

           نورلوسان‌ اوندان‌.

 یازیم‌ آتشسن‌؟

             اودلوسان‌ اوندان‌.

 یازیم‌ آنالار آناسیسان‌ سن؟

            اولوسان‌ اوندان‌.

 نه‌ یازیم‌ وطن‌؟

 دئییرم‌ بیر نغمه‌ بسته‌له‌ییم‌ من‌،

 سسیم‌ پروازلانیب‌، مین‌ بیر داغ‌ آشسین‌

 دوغروسو، دونیایا سیغمایان‌ اوره‌ک‌

 بو عاجیز قلمه‌ نئجه‌ سیغیشسین‌.

 *

دئییرم‌، گل‌ توتوم‌ اتک‌لریندن‌،

 آدیمی‌ آدینلا تانیسین‌ جاهان‌.

 بوآندا قلمیم‌، سسله‌نیرکی‌ سن‌،

 نه‌ صمد وورغون‌سان‌، نه‌ده‌ سلیمان‌.

*

 وصفینی‌ ائتمه‌یه‌ آذربایجانین‌،

 هاردادیر او قدرت‌، هاردادیر وطن‌.

 منه‌ بیر جاهاندیر سنین‌ هر آنین‌،

 فقط‌ ائللریندیر قلبیمدن‌ اؤتن‌.

*

 یوخ‌!آنا، یوخ‌! وطن‌، یوخ‌! عزیز دیار.

 صنعت‌ عالمینده‌ بو دئییل‌ پئشم‌.

 قورخورام‌ کلامیم‌، اولسون‌ ناغیلوار،

 شعر ایلهامیما توخونسون‌ تئشم‌.

*

 گول‌ نه‌دیر، تئل‌ نه‌دیر، بوتون‌ دونیانین‌،

 گوللری‌، تئل‌لری‌، بیر تئلین‌ اولماز.

 باش‌-باشا چاتسادا بوتون‌ گؤزل‌لیک‌،

 خزرین‌، سهندین‌، گؤی‌ گؤلون‌ اولماز.

*

 گولزاردا ائتمه‌دیم‌، هر گوله‌ تمکین‌.

 سئومه‌ییب‌، بویونا چلنگ‌ هؤرمه‌دیم‌،

 حتی‌ قوس‌ و قزح‌، او یئددی‌ رنگین‌،

 سنین‌ صورتینه‌ روا گؤرمه‌دیم‌.

*

 شانیندا یازماغا سنین‌ ای‌ وطن‌،

 قلمی‌، ایلهامی‌، بیر عمان‌ گره‌ک‌.

 او قدر عزیزسن‌، اوجاسان‌ کی‌ سن‌،

 وصفینی‌ ائتمه‌یه‌ سلیمان‌ گره‌ک‌.

*

 فقط‌ بیر بویا وار، دامارلاریمدا،

 عؤمرومله‌یاناشی‌ دوغولوب‌ ائکیز.

 اونونلا شعریمده‌، اعتباریمدا

 حیات‌ یوللاریندا بوی‌ آتمیشیق‌ بیز.

*

 او دا اؤز قانیمدیر، بدنیمده‌کی‌،

 اوندان‌ گرانبها نه‌ییم‌ وار آنا!

 منیم‌ قلمیمین‌، جوهری‌دیر او،

 اونسوز من‌ نه‌ یازیم‌ آذربایجانا.

*

 ایندی‌ سنگرده‌یم‌، کئچیب‌ جانیمدان‌،

 انقلاب‌ اوغلویام‌، اوزوم‌ ده‌ آغ‌دیر.

 صاباح‌ یارالانسام‌ ، آخان‌ قانیمدان‌

 داستانیم‌ آدینا یازیلاجاقدیر.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *