سئوگی حکایه‌سی
بابک قوجازاده
سنی گؤروب چاشیر ندن
سنه هر آن جوشان اورک
گؤرمه‌ینده ، سنی گؤرمک
اولور منه آرزی ـ دیلک.
***
سنه سئوگی آچماق اوچون
غم ـ کدردن قاچماق اوچون
لاپ گؤیلره اوچماق اوچون
اللرینی توتام گرک.
***
گؤزلرینه من جوماندا
اوتانیرسان ندن اوندا ؟
یاناقلارین قیزاراندا
کؤنول دولوب، داشیر اورک.
***
آددیم ـ آددیم آیاق آلتدا
تبریزله‌نیر آددیملاردا
تله‌سیرلر ساعاتلاردا
بو آخشامی باشا وئرک .
***
اؤرپه‌یینی ساچیر گئجه
گؤزلر دولور او آن نئجه
تله‌سیریک کوچه ـ کوچه
ساغوللاشیب ائوه گئدک.
***
بیر آی اولسون بیرده اؤزون
گیزلتمه هئچ مندن اوزون
قوی سؤیله‌ییم سؤزون دوزون
وورولوبدور سنه بابک …!
