سئوگی ناغیلی
مهدی خالد قراملکی
غربتده یازدیغیم سون شعرین اوستوندن،
ایللر گئچیر ،
سنی خاطیرلایاراق یازمیشدیم او شعری
بیر اوتوبوس دوراقیندا.
ایکینجی غربتیمین سون چاغلاریدی،
سن قالاجاقدین او غربتده منسیز،
و من باش توتوب گئتمه‌لیدیم بیلینمز بیر گله‌جکه ساری،
ایندیده او شهرین اوتوبوس دوراقیندان گلن
پیس قوخولار،
او گون او شعری یازدیغیم کاغاذدان قوخلانیر ،
اوز گؤزو یارا تؤکموش قوجا -قاریلاری ،
و قارالمیش دیشلرینن منیم یابانجی اولدوغوما گؤز تیکن افیونچولاری ،
و کؤرپه قوجاخلاریندا بؤیوک دؤشلریندن تر قوخوسو گلن دیلنچی آروادلاری ،
هله اونوتمامیشام من ،
اوناتمامیشام کی…
من هئچ بیر زامان او دوراقدان قالخمادیم سانکی ،
اوتوروب جذامیلره باخارکن سنی گؤزله‌دیم ،
اؤزله‌دیم ،
سیگار یاندیریب، شعر یازدیم و آغلادیم ،
هئچ زامان آغلاماقدان دویمادیم ،
گؤزله‌مکدن یورولمادیم ،
سن گلمه‌دین من ده هئچ زامان گئتمه‌دیم ،
باشقا بیر دوراقدان قایتمیشدین شهریوه ،
سونرالار آنلادیم ،
آمما من او دوراقدان هئچ زامان قالخمادیم ،
سیگار یاندیریب افیونچولارا باخار کن سنی اؤزله‌دیم ،
شعر یازیب قره‌چی قیزلارین دیلنمک ماهنیلارینی ائشیتدیم ،
گؤزلریم آغیرلاشدیلار ،
کیپریکلریمی بیرداها آچارکن ،
باشقا بیر غربتده ایدیم ،
آنا یوردوم ،
قوجا تبریزده ،
دوز گوی مچیدین قاباغینداکی داش سککیلرین اوستونده ،
اوتورموش ،
سنی گوزلوردوم…!
