اوروجلوق
چئویرن: خیرالله حق‌بیگی (ساپلاق)
ترجمه: خیرالله حق‌بیگی (ساپلاق)
خیرالله حق‌بیگی (ساپلاق)
00:00
00:00

ای کاش من اولایدیم قوربان سنه اوروجلوق!

لاییقدی قوربان اولسون بو جان سنه اوروجلوق!

×

جاندا هنوز رمق وار، دورما دایانما تئز گل

سینسیتمه‌یه بو خلقی یولدا یوبانما تئز گل

ایستی هاوا، سوسوزلوق، هئچ بیر اوتانما تئز گل

جان آلماغا وئریبلر فرمان سنه اوروجلوق!

×

ایستی وورار سوسوزدان چاتلار دیلیم، دوداغیم

گئسم دالیمجا گلمز بو ناتوان ایاغیم

بیر گوشه‌ده گیجللم، بیر آی بودور سایاغیم

بو رهنمودو وئرمز لقمان سنه اوروجلوق!

×

کاش فیکرین ایشله‌یئیدی قیش فصلی سن گلئیدین

خلقین فقط آجیندان بوش معده‌سین دلئیدین

من چکدیگیم عذابین اون‌دان بیرین بیلئیدین

قوربان اولاردیم اوندا هر آن سنه اوروجلوق!

×

نه “روس”ایله ایشین نه “گرجستان”ی تانیرسان

نه “آلمان”‌ی گزیب نه “آمریکا”‌نی تانیرسان

آنجاق بیر عده من تک سرگردانی تانیرسان

مسکن اولوب نه‌چون بو “ایران” سنه اوروجلوق!

×

او “انگلیس” ملعون قویماز سنی کناره

گئسن “ژاپن” دا حتمن نعشین چکلله داره

“روم”ا گئدیردین آمما پیس گلدی استخاره

آسماز قولاق او یئرده وارتان سنه اوروجلوق!

×

ایراندادا “کتایون”، “ژاله” سنی توتانماز

“عهدیه” و “منیره”، “هاله” سنی توتانماز

“گیسو” ائدیر الیندن ناله، سنی توتانماز

عاشیقدی “فاطما سولطان”، “ریحان” سنه اوروجلوق!

×

حیکمت نه‌دیر شهرده چوخلار سنه اینانماز

وقت سحر بیر عده یوخلار سنه اینانماز

هر کیمسه بیر بهانه ساخلار سنه اینانماز

کندین محیطی اولموش میدان سنه اوروجلوق!

×

ائتمزدیم اعتنا هئچ آخشام چاغی اذانه

باغرین هدف توتاردیم بوزلو سویا نیشانه

صبحانه‌نی ووراردیم قلبین دؤنردی قانه

نئیلیم کی باغلانیبدیر ایمان سنه اوروجلوق!

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

اوروجلوق

خیرالله حق‌بیگی (ساپلاق)
www.ishiq.net

آذربایجان ادبیات و اینجه‌صنعت سایتی