بو دونیا
محمد احمدی(بابک تورک)
آرزیم بودور غملی اوره‌ک اولمایا
اوندا گؤزه‌ل گؤرونه‌جک بو دونیا.
گول قونچاسی آچیلمامیش سولمایا
اوندا گؤزه‌ل گؤرونه‌جک بو دونیا.
×××
آیریلیقلار بوتونلشه، قوووشا
یامان گونلر گؤزدن ایتیب، سوووشا
هامی اینسان بیر- بیرینه یوووشا
اوندا گؤزه‌ل گؤرونه‌جک بو دونیا.
×××
کینه- کدر قاچاق دوشه آرادان
آغ دری‌لر سئچیلمه‌یه قارادان
راضی اولا بیزدن، بیزی یارادان
اوندا گؤزه‌ل گؤرونه‌جک بو دونیا.
×××
چیچکلنه هر یئر گولدن قوخویا
بولبول گول اوستونده نغمه اوخویا
گولله سسی قاریشمایا یوخویا
اوندا گؤزه‌ل گؤرونه‌جک بو دونیا.
×××
حاکیملرده قوی ائشیتسین بو سسی
“بایقوشوندا دار اولماسین قفسی”۱
راحت چیخسا اینسانلارین نفسی
اوندا گؤزه‌ل گؤرونه‌جک بو دونیا.
یک پاسخ
yaşa vallahi.dogrudan sag ol.facebook da yaydım