اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

سحره دوغرو گئده‌ن کاروان
مظفر درفشی

قرینه‌لر اوزونو، گؤزو یولدا قالانلار،
آزادلیق حسرتیله اوره‌یی چیرپینانلار،
آل شفق‌له، سحرله، عهد و پیمان باغلاییب
قارانلیغا، ظولمته باش ایمه‌ین اینسانلار،
ناحقّه، ظولمه قارشی داییم قیام ائده‌نلر،
چکینمه‌ییب اؤلومدن، ووروشان قهرمانلار،
قلبین توتوب الینده یولا ایشیق سالانلار…

اوزاقلاردان گلیرلر، اولوب کاروان گلیرلر؛
بیر ال‌لرینده بایراق، بیر ال‌لرینده مشعل.
اونلارین همهمه‌سی، آیاقلاری‌نین سسی،
اود پوسگورن نفه‌سی یاتمیشلاری اویالدیب
پاک ویجدانلی اینسانا دئییر بیزه قوشول گل!
گلین گئده‌ک گونشه دوغرو گئده‌ن سفره
ظولمتین باغرین یاریب، چاتاق آیدین سحره.

صفلرینه قوشولوب یوخودان اویانمیشلار،
ظولم اودونا یانمیشلار، حاقّی تاپدالانمیشلار؛
حیقارت دوستاغیندا سیتم‌لره یاخیلان،
آزادلیق شعله‌سی‌له قلبی آلوولانمیشلار؛
صداقتله، شرفله، حاق یولونا گئده‌نلر،
اینسانیت اوغروندا جانین قوربان ائده‌نلر…

دمیردن باشماق گئییب، دمیر عصالاری وار،
سانکی چوخ چتین بیر یول ائله‌ییب‌لر ایختیار؛
بو یولدا اوچوروملار، دومانلاردان کئچمه‌لی،
دره‌لردن، داغلاردان عمّانلاردان کئچمه‌لی،
بو یولدا مین تهلوکه، مین بیر خطر گؤرموش‌لر،
سایسیز گوللـه‌یه، اوخا داییم سینه گرمیش‌لر،
هر آددیمدا ییخیلان، دوشن آز اولمامیشدیر،
لیکن یئرده هئچ مشعل، هئچ بایراق قالمامیشدیر.

بو کاروان جاندان کئچمیش ایگیدلر کاروانی‌دیر،
گوللـه‌لنمیش، آسیلمیش شهیدلر کاروانی‌دیر.
بو اودور قهرمانلار، آصلانلار اوردوسودور،
شجاعتلی، موباریز اینسانلار اوردوسودور.
بو بئله بیر کاروان‌دیر، بو بئله بیر اوردودور،
اینسانیت، عدالت یوردو اونون یوردودور.
بو اوردونون نه اوجو، نه بوجاغی گؤرونور،
اینسانلارین تاریخی تکجه اونلا سورونور.

بو قول‌لار دونیاسینی چاتدیریر حریته،
تاریخ اونونلا گئدیب چاتیر ابدیته.
آلقیش بئله اوردویا، آلقیش اونون یولونا،
آلقیٌش اونون قدرتله بایراق توتان قولونا!
آلقیٌش اونون یولوندا دامجیلایان قانلارا،
آلقیٌش اونا قوشولان موباریز اینسانلارا!

اشتراک گذاری در print
چاپ

یک پاسخ

  1. الله روحون شاد ایله سین . یولودواملی اولسون. ایکدیغی گوللر ثمروئرسین .

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *