یول قرار وئرسین
س. داغلی
بیر شوم سحر چاغی دان جیزیلدارکن
آپاردیلار سنی بوردان
قوپاردیلار سنی مندن
بیر آغاجی اؤز کؤکوندن قوپاران کیمی
منسه دونوب قالدیم باخار کورا تای
الی-قولو باغلی
جانسیز بیر هئیکل
سسیمی ده اوتدوم نفسیم کیمی
قاراباخت قارانلیق چؤکدو باشیما
سن دئمه بو سحر گئرچک دئییلمیش
داها چوخ وار سحره سنه‌لر قده‌ر
سوررسه یئتیشمم سنه نه قده‌ر
گؤزلریم تیکیلمیش یولونا آرتیق
گونشه مرحبا اوگون دئمه‌لی
هله ده، هله ده، هله ده، هله
اینله‌ییر بیر آجی سیزی قلبیمده
یاشاییر زوغونون ایزی قلبیمده
بیترمی بو یارا؟
ایترمی بو ایتگی؟
یئترمی بو حسرت؟
بیله بیلمیرم
گؤزلمکله اولمور گرکدیر بونا
بیز یولا قویولاق یول قرار وئرسین.
