قاچاق یوللاری…
لیلا کحالی

 اؤزومدن چیخیرام

اوجا دووارلار !

اؤزومه دؤنورم

باغلی قاپیلار!

نئجه چیخماق اولور بو لامکان‌دان؟

هانسی تاکسی گئدیر

هانسی اوتوبوس؟

نه قاتار یوللانیر

نه اوچاق اوچور…

دوغولدوغوم قیش‌دان هله قار یاغیر

آنام آغری چکیر

دونیا فیرلانیر

باخیرام بو زیندان

اؤز بویومجادیر

اوزای دان اوزای آ !

آددیم با آددیم .

بیر آددیم ازل دیر

بیر آددیم ابد!

بیلسم کی سن وارسان

دووارلار قاپی ؛

قارانلیق ،

ایشیغین قاچاق یولودور…

نه تاکسی لار گلسین

نه باشقالاری

کیم تانیر

تانرینین ائوی هاردادیر؟