هر کس آللاهدان بیر پارچا؛
سن آللاهین هانسی پارچاسی‌سان‌می؟
اؤکسورور هر باخیشین دوشونجه‌لریمی،
گؤزلرین کور بیچاق
کسر ـ کسر، پارچالار هر نه‌ییمی.
گئتمه یانار، دؤنر دونیانین اوزون یوللاری،
یورار سنی، اینجیدر
دؤنر باشدان، یئیر سنی، گئتمه!
سن اؤکسوز دوشونجه‌لریمین آللاهی
من ایسه ایتدن آج،
ایلاندان چیپلاق سنه،
آج سنه،
یالاواج سنه.
گؤزلرین کور بیچاق؛
سن دئمه، سیتم سئوگی‌دن دوغارمیش!
ایچیمه چؤکدوم
اوره‌ییم آنامین کؤهنه صاندیغی
بیر یانیم موتلو، بیر یانیم سیزلار سنی.
یئتیم بیر یانلیزلیغیم وار
آغلارـ گولر ساچلاری
داغینیق،
آوارا،
یئتیم بیر یالنیزلیق…
اؤیله بیر اینساندیر گؤز یاشلاری بیله اؤزگور…
آغزینلا قوش توتسان دا
ساریلیب بوراخماز سنی.
حسرتدن دووار تیکر
دؤرد بیر یانینی سارار،
بارماقلیقلارا ساریلار اوره‌یین،
بئینینده کی ملودینین آنلامیندا بوغولورسون
اوووجلارینین سوسقوقلوغوندا!!!
سن آللاهین هانسی پارچاسی‌سان‌می؟!