بیر تورپاغین اوزهرینده بویا باشا چاتمیشیق!
آما ندن تورپاق اوچون اؤلوب، ایتیب، باتمیشیق؟
واحید اولان طبیعتی تیکه- تیکه بؤلموشوک
آجگؤز اولوب، اورتالیقدا سینیرلار یاراتمیشیق!
اؤزگور یاشام آرزوسویله تر تؤکن اینسانلاری
قانداللاییب، قول ائیلهییب، بازارلاردا ساتمیشیق!
هرنه داش وار توللامیشیق بیر – بیرینین باشینا
یولداشلیغین داشین چوخدان باشیمیزدان آتمیشیق!
ایتیرمیشیک بؤیوک -بؤیوک آماللارین یولونو،
خیردا -خیردا ایشلر ایله باشیمیزی قاتمیشیق!
گونده یوزو یوکون چاتار، گونده مینی آج یاتار
بختورجه فیل قولاغیندا نه راحت یاتمیشیق!
ایش بیرلیگی یاپماق اوچون قاریشقاجا اولمادیق
عؤمور بویو دالاشمیشیق، بیر- بیری آلداتمیشیق!
تاریخ بیزه جوت آیاقلی حیوان دئسه یانمارام
سانمارام کی اینسان اوغلو مقامینا چاتمیشیق!
اورمو-۱۶ بهمن۱۴۰۴
