سازاق هوپوب جانیما، اللریمده قار اوشویور
گئدن پاییز اوشویور، اوسته‌لیک باهار اوشویور
داریخدیران چیله‌دیر، اَن اوزون گئجه بو گئجه
بزه‌یلی خونچا گولور، قارپیز ایلا نار اوشویور
سیزیلداییر قارا نئی، بزمیده عاشیق اوخویور
موغاماتی دویاراق، هم کامانچا، تار اوشویور
کیتاب رفیمده دوران، دفتریم، یازیم، قلمیم
اوره‌کده سؤز قالانان، جانلی یادگار اوشویور
او وار، بو وار، هامی وار، سوندا چاتمایان بیری وار
اؤزوم یوخام بورادا، اولمایان او یار اوشویور
چؤکوب یاشیل مئشه‌یه، چووغون‌ایله، قار، شَپه‌لر
او جوت سؤیود اوشویور، یالقیز اول چینار اوشویور
قارانلیق حؤکم ائده‌مز، گون، سحر آچیلمالیدیر
کوراوغلو…چاپ قیرآتی، چات کی بیر نیگار اوشویور
گؤزللیگین بئشیگی، تام ووقارلی داغ، ساوالان
باخاندا آل گونشه، گؤزلری خمار اوشویور
تؤکولسه قان…، بیته‌جک، قان ایچنلرین حیاتی
آمان …!! آغاج اوشویور، کندیر ایله دار اوشویور
هؤروکلریم گول آچیر، طالعینده ائل- اوبامین
بو گون، اؤلوم یا اولوم، بوردا سون قرار اوشویور
30/۹/۱۴۰۴
چیلله گئجه‌سی