آدین آدیم
آدین قاچاق
هجری اؤزوندن قوچاق؛
آدین سؤزومون سورمهلی گؤزو
شعریمین یاناق چالاسی؛
آدین آدلیم آدلار آدایی، قوپوز آداسی؛
آدین اون‌مین ایللیک مدنیت
کئچیلمز چاناق قالاسی؛
آدین اورمو گؤلو، آدین ساوالان
اورال آلتای داغلاریندان اود پوسگورور آدین
بالکان یاریم آداسینین
دؤیوشکن تورکونون مانیفئستی‌دیر آدین؛
آدین گئجه … آدین گوندوز
آدین حالال، آدین حارام
دار آغاجی‌دیر…. آدین اعدام ….. آدین قیشقیران بیر یارام؛
گئجه ایله گوندوزون اؤپوش سرحدیدیر آدین؛
دئوریملرین دؤنوم نوقطه‌سی
قوردلار وادیسی
قینیندان سییریلمیش قلینجلار سسی؛
آدین بوتون جیلیز یاپیتلارین سونو
شاه اثر، کرال اویونو
جان اوجاغینین اودو، اودونو؛
آدین اویناییر منی، یانیر منی
آدین مارمارا دنیزی، آغلاییر منی، گولور منی؛
کؤورک دویغولار تیخاجی‌دیر
گؤزلریمی سوواریر آدین؛
هؤروکلریم غملی پاییزلاری سوپورور
و یاد نفه‌سی توخونمامیش دوداقلاریم
سن آدلی منی تامسینیر آستا؛
آدینین بیغلاری ائشمه …
پاپاغی گولله‌دن دئشمه …..؛
هوندور بویلو….، ائنلی کورکلی
یارلی- یاراشیقلی…..، قارتال باخیشلی
یاوروم منیم…! قوچاغیم منیم….!
آدیم منیم…! سانیم منیم….!
۱۵/۰۳/۱۴۰۳