وارلیغین یای فصلی، اوره‌یین باهار،
اوزونده پاییزین علامتی وار.
دونن یلدا اولان قارا ساچلارین
بوگون قیشدیر دئیه، بورونوبدو قار؟
سنین هر بیر گونون بیر ایل‌می کئچیر
یوخسا پیس گون‌مودور اینینه پالتار؟!
سازاقدا قورویوب گؤزونون یاشی،
تئلینی، اسدیکجه یئللر داغیدار.
منیمله گؤز- گؤزه دانیش هر شئیی!
اریدیبدیر سنی هانسی دویغولار؟
سوسوب، نییه یولا اوز چئویریرسن
اولمایا یول اوستو بیر قوناغین وار؟!
قوی سنه هر شئیین آچیغین دئییم
ایچی بوش اوره‌کده یاشار آرزولار!
جیغیرین سونوندا ، حسرتلی، تنها
سؤیکه‌نیب لال داشا چکمه اینتیظار!
