بیر آرزوم وار، آی آدام‌لار، قویون دئییم،
ساغلیغیندا قیمت وئرین اینسانلارا!
یاخشی‌لارا ساغلیغیندا یاخشی دئیین،
ساغلیغیندا یامان دئیین یامانلارا.
یالنیز، یالنیز ساغ اولاندا،
هر کس اصیل قیمتینی بیلر اوندا،
بو سؤزلریم دوز اولماسا تؤهمت ائدین.
سیزدن ریجا ائله‌ییرم میلیون کره،
شاعرلره ساغلیغیندا حؤرمت ائدین،
ساغلیغیندا هئیکل قویون اؤلمزلره…
گله‌جه‌یه چوخ دا اومید باغلامایین،
سؤزونوزو سونرا‌لارا ساخلامایین.
زهلم گئدیر سونرا‌لاردان،
واخت‌سیز دینن زورنا‌لاردان،
بوشبوغازدان، آوارا‌دان،
توی‌دان سونرا ناغارا‌دان.
ساغلیغیندا سئویندیرین تمیزلری،
سیز حیاتدا بو آمال‌لا آددیملایین.
ساغلیغیندا ایفشا ائدین خبیث‌لری،
ساتقین‌لارا ساغلیغیندا ساتقین دئیین،
تولکو دئیین تولکولره، آسلان دئیین آسلان‌لارا.
ساغلیغیندا قیمت وئرین اینسانلارا…!
هر کس بیلسین اؤز یئرینی نئجه ساغ‌دیر،
بو، پیس‌لرین حیاتینی قیسالتماق‌دیر،
یاخشی‌لارین حیاتینی اوزاتماقدیر…
بو ندن‌دیر اؤلن کیمی،
قلبیمیزده آدام‌لارا سئوگی، حؤرمت آشیب-داشیر.
اؤلن کیمی یاخشی‌لار دا یاخشیلاشیر،
یامان‌لار دا یاخشیلاشیر…
چیرکین‌لر ده تمیز اولور اؤلن کیمی…
یادلار بئله عزیز اولور اؤلن کیمی…
خاطیره‌لر سؤیله‌ییریک، نئکرولوق‌لار قوللاییریق،
هامیسینی اوجدان‌توتما یاخشی دئییب او دونیایا یوللاییریق.
بو گئجیکمیش خئییر-دعا کیمه گره‌ک؟
بوندان مزار بؤیویه‌جک، یا اؤلن‌می دیریله‌جک؟
خوشوم گلمیر بو کؤهنلمیش عادت‌لردن، خوشوم گلمیر…
بو سردابا سئوگی‌لردن، حؤرمت‌لردن خوشوم گلمیر.
ایسته‌میرم واخت-وعده‌سیز شؤهرتی من،
بیر آن عؤمرو میلیون قیزیل اؤلوم گله، ده‌ییشمه‌رم…
دیری اوچون یئنه بویدا حؤرمتی من
اؤلو اوچون مین هئیکله ده‌ییشمه‌رم…
دوز دئمه‌سم، اوندا منی باغیشلایین،
اوز توتارام اوشاق‌لارا، قوجا‌لارا، جاوان‌لارا،
ساغلیغیندا قیمت وئرین اینسانلارا!
یاخشی‌لارا ساغ اولاندا یاخشی دئیین،
ساغلیغیندا یامان دئیین یامانلارا…!
شعری گؤنده‌رن: ساحیل آرازلی
