غریبه گیره دوشدوم!؟
چئویرن: حمید آرش آزاد
ترجمه: حمید آرش آزاد
حمید آرش آزاد
00:00
00:00

 آلتمیش یاشی قویدوم دالا، آلتمیش بیره دوشدوم

آلتمیش بیر ایل اولموش، بو جهان‌دا گیره دوشدوم

شک‌سیز، منه روزی یازیلیب تک لبنیّات

شیت سوددن آنام آچدی‌‌دا، شور پندیره دوشدوم

شاید‌ده فلک اؤنجه‌سی گون روزی یازیرمیش

یول‌لار ترافیک اولدو، قالیب، تأخیره دوشدوم

وارلی اوشاغی موز یئدی، نارگیل‌ده دویونجا

من‌ده بیر اووج قوردلو- چوروک انجیره دوشدوم

قیش فصلی دوغولدوم، ولی عؤمروم بویو یاندیم

بلکه سببی شاختا ایدی تندیره دوشدوم؟!

یئرسیز دگیل ایپ باغلاییرام چوخ‌لارینا من

اوّل‌ده اؤزوم بنده گیریب، کندیره‌ دوشدوم

تاختا بئشیگ آلمیشدی آتام، چئوره‌سی زنجیر

اون گونلوک ایدیم من، او زمان زنجیره دوشدوم

آزادلیق اوچون، اسکی- بلک‌له گوله‌شیردیم

شؤرتوک بادالاق سالدی، ییخیلدیم، زیره دوشدوم

شؤرتوک- بلک‌ایله ال- آیاق باغلانیر اوّل

لاپ دوز دوغولان گون بو آجی تقدیره دوشدوم

گویا او زمان چوخلو خرابکارلیق ائدیردیم

یوزلر یول آتام حُکم وئریب، تعزیره دوشدوم

ظنّیم بودو، غرب ائیله‌دی فرهنگی تهاجم

چون‌کی، بو خرابکارلیغا بیردن- بیره دوشدوم

آمریکالی یوزلر کانال، اینتئرنئته لعنت

چون‌کی، هله قونداق زمانی تقصیره دوشدوم

نئیله‌ک؟ یئتیب آلتمیش بیره ایندی یاشیم، «آرش»!

مس اولدو قیزیل، شعرکیمی اکسیره دوشدوم

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

غریبه گیره دوشدوم!؟

حمید آرش آزاد
www.ishiq.net

آذربایجان ادبیات و اینجه‌صنعت سایتی