روحوموز دیریلیر گلنده آدین،
قادین آی قادین!
اوره‌یی سئوینیر تانیشین، یادین،
قادین آی قادین!

آنالار، باجی‌لار دوشورلر یادا،
جهاندا داهی‌لر وورغون بو آدا،
یا گیردین قینینا بیر عؤمور، یا دا
حیاتدا نه ظولوم چکدین، یاشادین،
قادین آی قادین!

یاشاییش سنینله نه گؤزه‌ل اولور،
سنسیز گوللریمیز آچمادان سولور،
سئوینجدن، شووقودان گؤزوموز دولور
مقصده چاتدیقجا آرزون، مورادین،
قادین آی قادین!

قادینلار گونودور سئوینیر هرکس،
جیگره خوش گلیر بیر آزاد نفس،
آرتیق اولمامالی یاشاییش قفس،
داها دادمالیسان حیاتین دادین،
قادین آی قادین!