اینجه صنعت باغی گوللنمه‌ده
بیر یاز گونو تر تؤکمه‌ده شاعر-
قابار ال‌لرله وئریب ال اله
مئیداندا قوروب بیر هانا هوندور
اریشی، آرقاشی سؤزدن
بویاسی گول بوتاسی چئشنیده آل لاله‌لی کؤزدن
آل یانار رنگ‌‌لری بیر یانار اوزدن
قاراسی بیر قارا گؤزدن.
بویاسی یوردوموزون گول- چیچه‌ییندن
مایاسی سئوگیلی بیر میللتین ایمکان امه‌ییندن
ائل‌‌لرین سوفراسی‌نین دوز- چؤره‌ییندن
ایشین هر بیر گره‌ییندن.
قادیر ال‌لرله ایپک خالچامیز الوان بویاناندا
اینجه گول یاپراغینا شِئه دوزولوب ژاله قوناندا
مورگولو میللت اؤلومجول یوخوسوندان اویاناندا
داغ کیمی سینه گریب ظولمه برابر دایاناندا
شاعرین ال‌لری سؤز قصرینی غوربتده یوناندا
شمع عشق ایچره دوشوب سئوگیلی پروانه یاناندا
سون قورولتای گونو ائل فرمانی داغدا اوخوناندا
گون چیخیب شاختا سیناندا،
سئچیرم سؤز‌لری زنگین دیلیمین گؤز ببه‌ییندن
کسیرم بال دولو بال شانه‌‌‌لرین دیل پته‌ییندن
دریرم نرگیزی آل لاله‌نی داغ‌لار اته‌ییندن
اولو شرقین گؤبه‌ییندن.
قارا رنگینده قارا گون‌لریمین خاطیره‌سی
هر رَجیندن اوجالیر گؤیلره مین ناله سسی
مکتب عشقینده یانان قیزلاریمین درس هوسی
قافلانین دار قفسی
هانا اوسته دوزولوب اینجه ایپک تئللی گؤزل قیزلاریمیز
اینجه نارین ایلمه سالاندا
قیزلارین ماهنی سسی اووج آلیب عرشه اوجالاندا
قلم الده دایانیب شاعریمیز بؤهته دالاندا
سانیسان اینجی دوزولموش
ائل باغیندان گول اوزولموش
آل قانی قیزلاریمین فرشه سوزولموش،
خالی الوان بویانیب قیزلاریمین آلجا قانیندان!
جانلانیر صحنه‌‌لری ائل‌لریمین شانلی جانیندان
داها بیر ساعت اؤتوب گئتمه‌ده صوبحون آذانیندان
گئجه ایتمیش، گئجه باتمیش
گونش آتمیش، سحر آچمیش
گون چیخیب، شاختا دا قاچمیش.
نسه یانماقدادی اود یوردوموزون تندیری باشدان
یونورام شعریمیزین قصرینی فرهاد کیمی مین بیر بویا داشدان
یئریدیب گئیدیریرم بیر بیری‌نین قارنینا ناققیشلاری نارین
گؤستریب عکس ائدیرم خالقیمیزین دار و نَدارین
دوشمانین یاد یاغیسین سئوگی سئور سئوگیلی یارین
شاختاسین گوللو باهارین.
نه یازیقلار کی باکیم تربیز ایله ال بیر اولانمیر
گونئیین دردینه من تک داها آرتیق او قالانمیر
داغینیق بو سولاری بیرلدیب آرخ ایچره سالانمیر
بیرلشیب بیر جان اولوب داغ کیمی اووجا اوجالانمیر
قاری دوشمانلاریمیزدان باج آلانمیر
شیر الیندن تاج آلانمیر.
تیره گؤیلرده گونش اوز بورویوب یاشماق آتاندا
خان خزر گؤز قاپاییب دالغالارین ایچره یاتاندا
آنکارا کرکوک ایله تربیزی بیر یئرده ساتاندا
چنلی بئل سئوگی‌لری ال بیر اولوب قول- قولا دوشدو
ساوالاندان باش آلیب قورخولو بیر سئل یولا دوشدو.
تکم اویناتما گلیب نازلی باهاری گتیرنده
یاز الیندن یاپیشیب شاختانی یولدان اؤتورنده
گون شاخیب گول چیچه‌یی داغ- دره، دوزده بیتیرنده
اینجه بیر قارچیچه‌یی شاختانین عؤمرون بیتیرنده
سیسقا نارین یاغیشین تارلالارا یاغماغی جان‌دی
قوجالیق موسمی بیتمیش یاز آچیب فصل جاوان‌دی.
او بیر ائل شاعری‌دیر ائل‌لری داغینیق گؤره بیلمیر
او یاد ائل‌لرده قالیب خالقینی جاندان هؤره بیلمیر
یازدیغی ائل بوی و دستانلارین اؤز ائل‌‌لرینه گؤندره بیلمیر
دوغما یوردونداکی ائل منظره‌سین سرگی‌لر ایچره سره بیلمیر
داها دؤش ده گره بیلمیر.
او بیر اوزگونچو کیمی دوغما دیلین بحرینه دالمیش
اوجالیب یوردوموزون اووجونا داغلارتک اوجالمیش
زینقیروو زنگینی باشدان یاتیب اویموشلارا چالمیش
چشنیلر چشنیسی سالمیش.
2003 – قیش
