ناحاق تلسمیشیک یولا چیخماغا
بو قاطار بیز دئین قاطار دئیلمیش.
یا سالار دره‌یه یا چیرپار داغا،
بو قاطار بیز دئین قاطار دئییلمیش.
بونون یولو باشقا، یؤنو باشقادیر،
سسینین آهنگی، تونو باشقادیر،
ازه‌لی باشقادیر، سونو باشقادیر،
بو قاطار بیز دئین قاطار دئییلمیش.
سؤنمه‌یه محکومدور اودو سؤنمه‌ین،
حاققینا حقسیزدیر گؤروب دینمه‌ین،
بیزدن دئییل بو قاطاردان ائنمه‌ین،
بو قاطار بیز دئین قاطار دئییلمیش.
