ارک قالاسی
رسول رضا

ووروشدولار:

سون گوﻟﻟﻪیه,

سون سونگویه,

سون قونداغا قده‎ر.

ووروشدولار:

هر شئی قیرمیزی گئیدی,

داشدان تورپاغا قده‎ر.

ووروشدولار:

آلت دوداقدان،

اوست دوداغا قالخا بیلمه‎ین سسه ‎قده‎ر.

ووروشدولار:

اونلاردان یئددی دفه, یئتمیش قات آرتـیق اولان

سونگولری نارین داراق دیشی کیمی, سیخ اولان دوشمنله.

یارالیلار اوفولدامادی

جان وئره‎نلر اینله‎مه‎دی

سوسوزلار- یاندیم!- دئمه‎دی.

اوپدو قوروموش دوداقلاری

قان هوپموش تورپاغی.

نه دوشمن اونلاردان بیر «آمان» سوزو آلا بیلدی،

نه بو اؤلومو یاغی دویدو,

نه قالا بیلدی.

سؤیکه‎نیب قالا دووارینا.

              اؤلدولر آیاق اوسته؛

                                چییین- چییینه.

اولدوزلار شاهید اولدو,

بیر سیرادا دایانمیش

اؤلولرین قاباغیندان

یوز یئره بؤلونموش دیریلرین چکیلدییینه.

اؤلدولر، آیاقلارینین آلتـیندا

                              وطن تورپاغی.

باشلاری‎نین اوستونده

                       وطن اولدوزلاری.

کؤنولدن کؤنوله کئچدی,

                 اومودلاری, آرزولاری.

گئجه آغیر- آغیر کئچدی,

                         جنازه‎لرین اوستوندن

کئچدی ، گئتدی یولو سحره

گونش شفقدن بیر اؤرتو چکدی,

                  تورپاغی قورویوب,

تورپاقدا دینجه‎لن جنازه‎لره.