یالچین قایالاری دولاشان قیزیم
مندن سلام آپار بیزیم داغلارا!
«کپز»یم «قوشقار»یم دوستاقدی دوستاق،
ایللردیر حسرتدی ایزیم داغلارا.
بوکولوب قامتیم، اییلیب بئلیم،
غم یوکو آغیردیر چکنمیر ائلیم،
ساوالان قدرتلی بو آنا دیلیم
هر گون آرزولاییر دؤزوم داغلارا.
چیرپینیر ائل‌لریم قانادسیز قوش تک،
دومانی، چیسگینی یولوموزدان چک،
خینالی ککلیک تک قایالاردا سک،
سن سولماز چیچکسن قیزیم داغلارا.
کؤکسومده داغ داغا جالان اولوبدور،
ائللریمین بند- بندی سولوبدور،
گنج نسیل‌لر پرن – پرن اولوبدور،
کدرله کؤکله‌نیب سازیم داغلارا.
بوز بولاق اوستونده کؤکسونو اؤتور،
بیر چنگه تبرریک داغدان قار گؤتور،
او قاری سارسیلمیش ائلیمه یئتیر،
بلکه درمان اولوب بیزیم داغلارا!
ایزن وئر قوینوندا دینجه‌لیم یاتیم،
ایللرین کدرین باشیمدان آتیم،
شنلیک شله‌سینی چیینیمه چاتیم،
یوز قوربان کسه‌رم اؤزوم داغلارا.
زومرود بولاقلارین قایناسین داشسین،
یوردومون شنلیگی باشیندان آشسین،
«کؤنول» دایانمادان نغمه‌لر قوشسون،
سؤنمز چیراق اولسون گؤزوم داغلارا.
