گئجه‌لر نه قده‌ر ظولمت اولسادا
چیلله‌نین سونوندا دان یئری واردیر.
گؤزلرده آرزیلار، حسرت اولسادا
جانلاردا اومودون شان یئری واردیر.

پاییزی کدرلی اولان چیلله‌نین،
سئوینجی دوداقدا سولان چیلله‌نین،
اوره‌یی نیسگیله، دولان چیلله‌نین
قیزارمیش ناریندا قان یئری واردیر.

قارپیزلار کسیلمیش اوره‌ک بندی تک،
سویوقدور بوغازدا دار کمندی تک،
رهلری تزویردیر ریا فندی تک
کال چیخسا، آلنیندا مان یئری واردیر.

گونشی دوستاقدا ساخلاماق هدر،
گونونده قارانلیق دورمادان گئده‌ر،
عؤمورلر ایزینده قالان غم – کدر
هله کی جانلاردا آن یئری واردیر.

چیلله‌نین عؤمرونو ییخان گونشده،
ظولمتین باغرینی سیخان گونشده،
آزادلیق آدینا چیخان گونشده
آلنیندا شهیددن جان یئری واردیر.

گونشه اوجالماق یوردومون دبی،
بو یولدا آدلانیب کوروغلو، نبی،
«ائلمان»ام هر زامان ظولمون سببی
ائلیمین قارشیندا خان یئری واردیر.