توخونور بئینیمده اؤلوم نوتلاری،
بیتیر دار آغاجی مئلودوسوندان.
هر سحر اذانی بیر من آسیلیر،
اؤلور منده‌کی من اونون یاسیندان.

مین قادین آغلاییر بئینیمده منیم،
یاشامدان آزادلیق ایسته‌ییر اونلار.
آزادلیق نه‌دیر کی قورخوسوز اوندان!؟
نه‌دن‌دیر تؤکولور گناهسیز قانلار!؟

نه‌دن‌دیر قان قوسور آخشاملار شه‌هر،
«اوختای»‌لار هر آخشام گولـله‌له‌نیری!؟
«مرضیه» له‌چه‌یی ایسته‌میر داها،
نه‌دن‌دیر آزادلیق سیله‌له‌نیری!؟

دوشونجه یوخلوغو چیرپینیر گؤزه،
قادینی اؤلدورمک غیرت ساییلیر.
ناموس سؤزجوکوندن گؤر نه قان دامیر،
باخ سن‌لر گؤردوکجه من‌لر آییلیر!

بیر کیشی قیزی‌نین باشینی کسیر،
او بیرسی قادینین دوغراییر اؤزو.
قالانی قالیرسا اذان آساجاق،
نه باها ساتیلیر آزادلیق سؤزو!

بو آخشام قورتولسا گئجه باشلانار،
گئجه‌لر اوزگوندور بوردا دویغولار.
پلیسلر یاتارسا پرابلئمی یوخ،
سس‌سیزدیر گئجه‌یه حاکیم اوغرولار.

ایستَردیم بیرداها گونش چیخمایا،
گونش چیخمادان دا اذان وئریلیر.
بو اذان، گؤره‌سن کیمی آساجاق!؟
هر اذان سسینده حیات بیتیلیر.

هر سحر اذانی بیر من آسیلیر،
بیر من یالواریری آنام بیلمه‌سین.
منی اولدورسه‌نیز نئینک اؤلدورون،
آزادلیق باغیران آنام اؤلمه‌سین!