غم‌لریم جوشدو گئنه اولدو خبردار قلم
قاره بختی یوخودان ائیله‌دی بیدار قلم
گؤزلرین قان یاشینی سیزدی حزین یازدیقیجاق
صبحه‌جن اولدو منه سئومه‌لی غمخوار قلم
خال تکوینیده بیر نقطه اولوب صبر ائله‌دیم
دؤره‌مه چکدی قیزیل طرّه‌لی پرگار قلم
دردیمی تؤکدو تمنّا باغی‌نین باغچاسینا
اولدو بو دردلری‌لن همدم و بیمار قلم
دویغولار ناله چکیب دالغالانیب سینسه‌دیلر
عشق اودون حلقه سالیب هریانا دوّار قلم
طعنه‌ی اهل ملامت هله خمپاره سالیر
جالاییر دردینی هر صفحیه سیّار قلم
کوی محنتده طواف ائتمه‌گه لایق دئییلم
سعی‌لن ائیله‌دی بو مروه‌نی هموار قلم
وار بو سئودادا یقین سرّ سماوات درین
ساغری دولدوغوجاق سؤیله‌دی اسرار قلم
گؤزلرین آتشی بو سینه‌نی سوزان ائله‌دی
باغریم اودلاندیقیجاق اولدو منه یار قلم
لیلی‌نین ساچین آچیب مجنونو زنجیره چکیب
عاغلیلان صبری آتیب اولدو گرفتار قلم
تا حبیبین غمی دریالری حئیرتده قویوب
ایسته‌مز بیر ده حزین سؤیله‌یه او زار قلم
جواد زیوه‌ای
چئویرن: جواد زیوه‌ای
ترجمه: جواد زیوه‌ای
سسلندیرن: جواد زیوه‌ای
- شعر
- اوخوماق زامانی: < 1 دقیقه
- https://ishiq.net/?p=33204
چاپ
