چئویرن: خیرالله حق‌بیگی (ساپلاق)
ترجمه: خیرالله حق‌بیگی (ساپلاق)
خیرالله حق‌بیگی (ساپلاق)
00:00
00:00

خیراله حق‌بیگی (ساپلاق) – (۲۰/۱۲/۱۳۲۰ هریس – ۸ خرداد ۱۳۸۸ – کرج)

الا یا ایهال‌یوخسول! ائشیت بو سؤزلری، بیل ها!
بو مطلب‌لر بیزه گؤیدن اولوبدور وحی نازل ها!
کیرایه ائوده اَیلشسن همیشه احترام ائیله
اَییل ائو صاحیبین گؤرجک، تاپیلماز یوخسا منزیل ها!

گؤرنده مالیکی باش اَی آماندیر ائیله‌مه غفلت
اونون شانیندن آرتیق اولماسین بیر آیری سؤز-صؤحبت
گره‌ک یوخسول اَییلسین اغنیایه ائیله‌سین حؤرمت
تغافل ائیله‌سن ایش‌لر اولار بوندان دا موشگول ها!

یاراتمیش خالق سبحان بوتون دونیانی اعیانه
اونون وار باشقا بیر لطفی جهاندا پوللو اینسانه
گؤزتله دینیوی چپ باخما اوغلان مالیکه، خانه
وگرنه باشیوا داش یاغدیرار گؤیدن ابابیل ها!

دئیرلر اغنیانین وار فقط آزجا بو دونیاسی
اگر چی واردی اونلارین طاووس تک نازلی لئیلاسی
اولانماز پوللونون یوخسول کیمی بیر شانلی عقباسی
خبر وار حوری اولماز اونلارا عقباده شامیل ها!

اگر قویسان قدم بیر گون ایاغین چاتسا بازاره
دریندن حؤرمتین اولسون همیشه قوم تجاره
جسارت ائیله‌مه اونلارداکی اوچ نقطه کرداره
دولاشما تاجیره حاشا، بئله ایش گؤرمز عاقیل ها!

اگر دهقانسان عؤمرونده تواضع ائیله فئوداله
قضایه اعتقاد ائیله گؤزون تیک شانسا اقباله
آپارسا محصولو مالیک اور‌ه‌کدن ائیله‌مه ناله
بئله ناللاللار انگیندن دورارسان دونبالاق میل ها!

بو دونیا فانی‌دیر، یوخسول گره‌ک ده هوشیار اولسون
مزاری یادینا سالسین، ایشی آه ایله زار اولسون
مبادا حیطه‌ی فیکرین بو معنادان کنار اولسون
او دونیادا سوخارلار گؤزلرینه آتشین میل ها!

بو دونیادا صبور اولسان تحمل ائیله‌سن درده
او دمدن کی وفات ائتدین گؤزوندن گؤترولر پرده
بهشته هوپبانارسان، خوش یاشارسان او گؤزه‌ل یئرده
یازیب بو مطلبی حتا بیزه تورات و انجیل ها!

اوره‌یین ایسته‌جک اوردا یئیرسن گولبه‌سر، قارپیز
بیتیب هر گوشه‌سینده قاز آیاغی، آغجاباش، یارپیز
کباب بیر گوشه‌ده حاضیر، او یاندا قوورولور جیزبیز
آغاج‌لار خود به خود جهجه وورورلار مثل بولبول ها!

چالیش سن دونیادا قویما گئده صوم و صلات الدن
بو دونیا فانی‌دیر، آنجاق چیخار بیر گون حیات الدن
بیر ایش‌لر گؤرمه عقباده اوچا قوش تک نجات الدن
آسار ارباب خازن دانبیلیندان اودلو دنبیل ها!

او قومی ایسته‌ییب آللاه، دولاشما پوللو اینسانه
اینانما هر سؤزه، اونلار ناغیل‌دیر، جومله افسانه
دانیشما بعضی مطلب‌لر، توخونما دینه، ایمانه
یقینا دینسیز اینسانلار سیزه اؤیرتدیلر دیل ها!

روایت ائیله‌ییر راوی: اگر چپ باخسان اعیانه
چکیرلر اینسانی دوزخده بیر دهشتلی مئیدانه
دوزولموش گؤزلری اودلو ایلان‌لار اوردا یان- یانه
تؤکورلر مجرمین لاپ آغزینا دوزخده فیلفیل ها!

الینده آتشین گورزو دایانمیش مالک دوزخ
آدامی گؤرجک حیرصیندن چکیر نعره، ائدیر وخ- وخ
دیلیندن کیمسه باش تاپماز کی گویا سؤیله‌ییر یا حق
ائشیت بو سؤزلری قارداش، آماندیر اولما غافیل ها!

۱۳۶۴ – کرج

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یوخسول

خیرالله حق‌بیگی (ساپلاق)
www.ishiq.net

آذربایجان ادبیات و اینجه‌صنعت سایتی

یوخسول

خیرالله حق‌بیگی (ساپلاق)
www.ishiq.net

آذربایجان ادبیات و اینجه‌صنعت سایتی

یوخسول

خیرالله حق‌بیگی (ساپلاق)
www.ishiq.net

آذربایجان ادبیات و اینجه‌صنعت سایتی