کؤلگم / نوید سرور (۱۳۴۱-۲۴ دی ۱۳۹۵)

من گئدیرم کؤلگم گئدیر
کؤلگم منه آرخالانیر؛
دوز گئتسم‌ده یولوم‌لا من
او ساللانیر،
او آسیلیر.
آیاغیمدان قوپان سس‌دن
او چکینمز
هئچ کویومز،
تپیک‌له‌نر، اؤلدوم دئمز.

من گئدیرم کؤلگم گئدیر،
گاه اوزانیر
گاه قیسالیر.
بعضا آیاز بیر گئجه‌ده
مندن اؤنده
مندن گئری
گاه اوزاقدا
گاه‌دا بری گئدیر کؤلگم.
بودور،
کؤلگم وارسا من ده وارام
دئمک اونو
وارلیغیم‌لا من دوغارام.

دئمیرم کی، من اولاندا کؤلگم اولار
کؤلگه‌سیز ده چوخلاری وار؛
سؤزوم بودور:
اولماسا نور
نه من وارام، نه ده کؤلگم،
ایشیق وارسا
اؤز کؤلگم‌ده گؤرونه‌رم.
بو سببدن
وارلیق دوغان ایشیق‌لارا منتدارام.
1370- تبریز