دردیمیز
هایده بلوکی (اؤزلم)
محبت سارایی اودا چکیلدی،
نیسگیللی گؤزلره قادا چکیلدی،
یاشاملار توپراغا، بادا چکیلدی،
نه دن بیتمز اولدو سئوگی دردیمیز؟
سس‌سیزجه یاشادی دویغو هارایلار،
سینه‌دن سوزولور سازلی هارایلار،
کدره بولاشیب ایللر هم آیلار
نه دن ایتمز اولدو سئوگی دردیمیز؟
شعریمیزده هیجا آلیشیب یاندی،
قوشمالار ال اله گئدیب دایاندی؛
گرایلی، غزلی، دیوانی داندی
نه دن یئتمز اولدو سئوگی دردیمیز؟
«اؤزلم»ین سئوگیسی ایتیبدی دیلده،
سوروشون آختارین قانادسیز یئلده!
بوغولوبدور دیلسیز سارالار سئلده،
نه دن گئتمز اولدو سئوگی دردیمیز؟
