اوجا داغین چیین‌لرینه یوکسلمک…/ خسرو باقرپور– چئویرن: ائلدار موغانلی
خسرو باقرپور
چئویرن: ائلدار موغانلی
ترجمه: ائلدار موغانلی
ائلدار موغانلی
00:00
00:00

قاچدیم!…
«سعید»ین قانی‌نین قاتیلیغیندان
«سیامک»ین گؤز- گؤز اولموش کؤینه‌ییندن؛
گوندوزلر آی ایشیغی‌نین شاشغینی‌،
گئجه‌لر ایسه گونشین کئفلیسی‌ایدیم.

قاچدیم!
باریت قوخویان آی‌دان
و قیغیلجیملاری توستو، جنون پوسگورن گونش‌دن؛
آپاردیم اؤزومله-
«نیلوفر»ین مکتوبونو
«نسترن»ین قلمینی
«کسرا»نین آلین قیریش‌لارینی
و «بهروز»ون غملی باخیش‌لارینی.

کئچدیم گدیکلرین اوموزوندان
بویلاندیم بولودلارین ایچیندن
کولک کوشولتوسویدو،
بیرده شاشغینلیق گئنیشلییی؛
بورنوم
کؤهنه کاغاز قوخوسوندان دولموش‌ایدی.

بوراخیلمیش فابریکین سویوق چئوره‌سینده
شاشغین بیر مارال گؤردوم
چیرپیردی یالقیزلیق بوینوزون
قوجامان بیر قارا چؤهره‌یه
و آغلاییردی زانباق، چیچک حسرتینده.

داهی‌لر پادشاهی
بیلیجی بیر بایقوش گؤردوم
قاچیردی قوشلار اوندان
او ایسه
خسته بیر سیچاندان ساوای
قاناد آچمیردی باشقا بیر اووا.

سنه اوخشار دؤزوملو بیر قایا گؤردوم
دامیردی گؤز یاشلاری بوکولموش دیزلرینه.
قالخدیم قایایا
گورولدادی گؤی
اوفوقون چیینینه
تاخیلدی‌سا شیمشک سونگوسو
یاغمادی آنجاق؛
نه گوندوز ایدی نه گئجه
دولموشدو قافلان سوموک‌لریله
آیاق آلتینداکی دره.

فراز آمدن بر شانه‌های کوهِ بلند…
خسرو باقرپور

از کتاب «از انگشتانم بپرس»

خسرو باقرپور | ترجمه: 
خسرو باقرپور | چئویرن: 
ائلدار موغانلی
اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

اوجا داغین چیین‌لرینه یوکسلمک…/ خسرو باقرپور– چئویرن: ائلدار موغانلی

ائلدار موغانلی
www.ishiq.net

آذربایجان ادبیات و اینجه‌صنعت سایتی