ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

صالح سجادی

اینانیردیق گئجه‌دن دان چیخاجاق قارشیمیزا
داغی آشساق یاشیل اورمان چیخاجاق قارشیمیزا

اینانیردیق او گؤزل گزمه‌لی اورمانلار اگر
قورخولاردان آپاراق جان چیخاجاق قارشیمیزا

بیر ناغیل سحرینه آلدانمیشیدیق بیلمیردیک
آجی گئرچک‌لر اوباشدان چیخاجاق قارشیمیزا

زیروه لر آردیجا چیخدیق اوجا داغلار باشینا
بیلمه دیک زیروه ده وولکان چیخاجاق قارشیمیزا

اووچولار گؤلله‌له‌دی اورمانا اوز دونده‌ردیک
نه بیلیردیک دلی قافلان چیخاجاق قارشیمیزا

چیراغ الده گزیریک تبریزی هر دن دئییریک :
گؤره سن بوردا بیر (اینسان)1 چیخاجاق قارشیمیزا؟

قالدیریلمیش قارا پرچم لره گوز تیکمیشدیک
بیز سانیردیق آپ آل عوصیان چیخاجاق قارشیمیزا

سن دئدین: باخ خیاوانلار آراسی نرده لره
من دئدیم : آخ یئنه زیندان چیخاجاق قارشیمیزا

سن دئدین : تهلوکه‌لر وار تانی دوست دوشمنیوی
بونو اؤیرن هره هاردان چیخاجاق قارشیمیزا

دوشمن او دوست‌دی کی گلسه قاباقدان گله جک
دوست او دوشمن‌دی کی دالدان چیخاجاق قارشیمیزا

دوشدو گویدن یئره بیر آلما ال آتدیم گوتوره م
سن دئدین:آت یئره شیطان چیخاجاق قارشیمیزا

بیز توکندیک گئجه باتدی سحری تامسینیریق
زیل گونش ایندی افق‌دان چیخاجاق قارشیمیزا

من دئدیم:زیروه ده اورمان دا یالان چیخدی؟ دئدین:
داغی آشساق یاشیل اورمان چیخاجاق قارشیمیزا

2 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *