صبیر داشی
عزیز سلامی

من اونو
صبیر داشی بیلدیم اؤزومه
ناغیللاردا اولدوغو کیمی.
قاپایاراق قاپی-باجامی
قویاردیم اؤنومه صبیر داشیمی،
آچاردیم اونا
سیرریمی، آجیمی.
او سوسمازدی ناغیللاردا
اولدوغو کیمی،
دانیشاردی دا، دینردی ده،
«سیخیلما، هر نه یاخشی اولاجاق!»
دئیردی ده.
منیم بئله بیر صبیر داشیم واردی،
سیرریمی، سؤزومو
اؤزونه ییغاردی.
بیر گون
اونا دئدیکلریمی
باشقاسینادان دینله‌دیم،
بیلدیم کی
سؤیله‌ییرمیش صبیر داشیم
سؤزلریمی اؤزگه‌سینه.
ناغیللارداکی صبیر داشی
نه دانیشار، نه دینر،
یالنیز دینلر و دینلر …
بیر گون توکنر صبری،
چاتلایار.
آما منیم صبیر داشیم
بئله اولمادی،
او نه چاتلامادی
نه ده منیم سیرریمی
گیزله‌مه‌دی، ساخلامادی.
من صبیر داشیمی
اؤزوم چاتلاتماق ایسته‌دیم،
آما ائتمه‌دیم،
اینسان داش دئییل آخی،
اینسان‌دیر.
آنجاق آند ایچدیم کی
داشدان صبیر داشیم یوخسا،
اینساندان صبیر داشیم اولماسین.
سیرریم
قاپی-قاپی گزمه‌سین،
سؤزوم آغیز-آغیز دولاشماسین.