صبیر داشی
عزیز سلامی
من اونو
صبیر داشی بیلدیم اؤزومه
ناغیللاردا اولدوغو کیمی.
قاپایاراق قاپی-باجامی
قویاردیم اؤنومه صبیر داشیمی،
آچاردیم اونا
سیرریمی، آجیمی.
او سوسمازدی ناغیللاردا
اولدوغو کیمی،
دانیشاردی دا، دینردی ده،
«سیخیلما، هر نه یاخشی اولاجاق!»
دئیردی ده.
منیم بئله بیر صبیر داشیم واردی،
سیرریمی، سؤزومو
اؤزونه ییغاردی.
بیر گون
اونا دئدیکلریمی
باشقاسینادان دینله‌دیم،
بیلدیم کی
سؤیله‌ییرمیش صبیر داشیم
سؤزلریمی اؤزگه‌سینه.
ناغیللارداکی صبیر داشی
نه دانیشار، نه دینر،
یالنیز دینلر و دینلر …
بیر گون توکنر صبری،
چاتلایار.
آما منیم صبیر داشیم
بئله اولمادی،
او نه چاتلامادی
نه ده منیم سیرریمی
گیزله‌مه‌دی، ساخلامادی.
من صبیر داشیمی
اؤزوم چاتلاتماق ایسته‌دیم،
آما ائتمه‌دیم،
اینسان داش دئییل آخی،
اینسان‌دیر.
آنجاق آند ایچدیم کی
داشدان صبیر داشیم یوخسا،
اینساندان صبیر داشیم اولماسین.
سیرریم
قاپی-قاپی گزمه‌سین،
سؤزوم آغیز-آغیز دولاشماسین.
یک پاسخ
شئعیر سربست اولاراق فورما ایله ایچ قاتلارین سئویشمه‌لرینی میصرع لرین گؤزل‌لییینده آیدینجاسینا آلا بیلدیم. شاعیر بَی سیررلره بلشمیش میصرع‌لری صبیر داشینین جنسیتینی نظره آلابیلمه‌دن اؤزو اوچون ساخلامادیقلاری حالدا! «اؤزگه سیندن» نه اوماجاغینی یئرسیز دوشوندوم! صبیر داشی داش دا اولسا پاتلایار بیر گون !آنجاق شئعیر دوغرودان دا گؤزلدیر. وار اولون عزیز.