آغری‌بابا
بهزاد بیات‌فرد
گؤز آچ بو فینجانا باخ گؤر نه فالدی آغری‌بابا!
نه کئفده‌یم، نه دورومدور، نه حالدی آغری‌بابا!
بوغازدا هئی داشیرام بیر داغارجیغین سؤزونو
حییف سسیم قایالار آلتدا قالدی آغری‌بابا!
بو لوولو درده داوام یوخ دئنن فلک کئچینه،
یاخامی مرد الینه بلکه سالدی آغری‌بابا!
هامی عاشیق چاغیرار اویناماقدان اؤتورو، آما-
بیزه گلن هر عاشیق آغی چالدی آغری‌بابا!
بو گون اؤنومده کی کؤلگه باشیمدا زیروه‌له‌نن
دونن قارامجا دولاندی، اوجالدی آغری‌بابا!
دی هانسی کوللوگون آنجاق کولون باشا اله‌ییم
اورکده قالدی خوش‌آن‌لار، قارالدی آغری‌بابا!
ایگید اگر اؤزون آسسا اوجا بوداقدان آسار،
اؤلوم زهر ده اولا، بوردا بال‌دی آغری‌بابا!
