کیم‌سن؟
سهیلا نیکخواه
کیم‌سن؟
پاییزین اوره‌یینه هوپان یاغیش؛
یا کی سارالمیش یارپاغین قوپان سسی؟
کیم‌سن؟
قهوه‌نین بوغوندا دادلانان آجی؛
یا کی قیزارمیش گونشین باتان چاغی؟
کیم‌سن؟
باغریما کال داریخمالار دوشن چاغی
یا اوچوروملار قوینونا
هؤنکور- هؤنکور دامان دومان؟
هؤرورم گئجه‌نین ساچین؛
قوروشقامدا آجی قهوه قیزیشیر
یاش یارپاق یاپیشیر
شوشه‌نین دال اوزونه؛
شیلتاق وئریر هاوا،
کولک هووخورور؛
کیم‌سن دلیجه دؤیورسن باجانی…؟!
۹۸ – مهر آیی
